«Būl balalarǧa jasalǧan qastandyq», deidı aqtaulyq ata-analar

Aqtaulyq ata-analar qaşyqtan oqytuǧa qarsy. Olar koronavirusqa qatysty jaǧdai tūraqtalǧanyna qaramastan, balalardy qaşyqtan oqytuǧa şeşım qabyldaǧan qūzyrly mekemelerge ökpesı qara qazandai.

Indetke bailanysty jaǧdai tūraqtalsa da, jergılıktı bilık kezekşı synyptar aşuǧa qūlyqsyz ekenın alǧa tartqan aqtaulyq ata-analar öz narazylyǧyn bıldırıp, qol jinauǧa kırıskenın mälımdedı. Aqtaulyq ata- analar üide bala oqytumen qatar jūmys ısteuge mümkındıgı bolmaitynyn aitady. «Menıŋ tört balamnyŋ üşeuı mektep jasyndaǧylar. Jaŋa oqu jylyna az qaldy. Men balalarymdy üide qalai oqytamyn, eş tüsıne alar emespın. Jekemenşık monşalar men jaǧajailarda sanitarlyq talap saqtalady eken de, al mektepte būl talap saqtalmai ma sonda? Mūny kım oilap şyǧardy? Qisyndy ma būl?» deidı ata-analar. Olardyŋ paiymdauynşa, är öŋır jaǧdaiyna qarai qaşyqtan oqytu mäselesı boiynşa şeşım qabyldauy kerek. «Aqtau bılım beru basqarmasynyŋ basşysy Tölebaeva Svetlana 31 şıldede Maŋǧystau oblysy ındet qaupı boiynşa qyzyl syzyqta ekenın aitty. Kezekşı synyptar bolmaidy dedı. Al  27 şıldede bızdegı provizorlyq stasionarlar jabyldy. 4 tamyzda Ükımet basşysy Asqar Maminmen ötken selektorly jiynda epidemiologiialyq ahualǧa bailanysty şalǧai auyldaǧy şaǧyn mektepter ştatty rejimde jūmys ısteitını söz boldy. Ükımet basşysy sanitarlyq talapty qataŋ saqtai otyryp, bastauyş synyp oquşylary eger ata-analary ötınış bıldırse, kezekşı synyptarda bılım alatynyn da osy jiynda aitty. Mamin maǧan osyndai qūqyq berse, Svetlana Tölebaeva būl qūqyǧymdy şektep otyr. Būl az deseŋız, 10 tamyzda Densaulyq saqtau ministrlıgınıŋ resmi ökılı Baǧdat Qojahmetov Qazaqstandaǧy koronavirustyŋ taraluy toqtaǧanyn mälımdedı. Kımge senemız?»-deidı tükke tüsınbegen ata-analar. Mūnan bölek, olar internet bailanystyŋ sapasyna qatysty da şaǧym jasady. «İnternet bailanystyŋ sapasy syn kötermeidı. Köktemgı karantinde mūǧalımder tapsyrmany telegram kanalǧa tastap qana otyrdy. Sabaqty tüsındıre almaudy  internet naşarlyǧymen bailanystyrdy.  Iýtubtaǧy sabaqqa sılteme berıp, tapsyrmany oryndaudy talap ettı. Ärine, bala iutubtaǧy sabaqqa tüsınbeidı. Aqyrynda sabaqty tüsındıru jūmysy ata- ananyŋ enşısıne qaldy. Mūǧalım men ata-ananyŋ sabaq tüsındıruı ekı bölek bolǧandyqtan, balamyzdyŋ bılımı tömendemese, arta qoimady. Aǧylşyn tılınıŋ onlain sabaǧy üş minuttan tūrady. Sosyn üi tapsyrmasyn oryndau kerek. Däl solai qazaq tılı pänıne qatysty aituǧa bolady. Balalarymyz būdan qalai bılım alady?» degen ata-analar öz sūraqtaryna Bılım basqarmasy ökılderınıŋ jauap beruın talap etude. Olar «Maŋǧystau oblysynda kezekşı synyptar aşylsyn» degen talappen ata analar qol jinauǧa kırıstı. Aqparat közı: «Lada.kz»