Şymkent qalasynyŋ 3549 tūrǧyny «Bastau Biznes» baǧdarlamasy boiynşa käsıpkerlık negızderın meŋgeru boiynşa oqytudan öttı. Onyŋ 2820-na oqudy aiaqtaǧany turaly sertifikat berılse, 729-na qatysqany turaly sertifikat tabystaldy.
Käsıpkerlık negızderın meŋgergen tülekter oqu aiaqtalǧan soŋ test tapsyrady. Üş mümkındık berıledı. Emtihannan ötpese, tek oquǧa qatysqany jönınde ǧana sertifikat alady. Eger testıden jaqsy nätije körsetse, oqudy bıtırgenı jaily sertifikat alyp, grantqa ümıtker bolady. Grant qaitarymsyz, bıraq monitoringtık top arnaiy tekseru jūmystaryn jürgızıp otyrady. Iаǧni būl – äleumettık kömek emes, käsıbın bastauşy kısılerge biznes josparyn ıske asyruyna jasalyp jatqan mümkındık.
Arnaiy qūrylǧan komissiianyŋ qorytyndysynan keiın jobasy maqūldanǧan baǧdarlamaǧa qatysuşylar memleket tarapynan berıletın 200 AEK kölemındegı grantty alatyn bolady.
Biyl karantindık şaralardy eskere otyryp, būl jobaǧa tırkelu men oqu qaşyqtyqtan (onlain) «Atameken Academy» platformasy arqyly ötude. Jobaǧa qatysuşylar eŋ aldymen halyqty jūmyspen qamtu ortalyǧynan joldama aluy tiıs. Ary qarai «Atameken» Käsıpkerler palatasyna kelmei-aq, oquǧa onlain tırkele alady. Ol üşın jeke basyn kuälandyratyn qūjatty jäne halyqty jūmyspen qamtu ortalyǧy bergen joldamany https://atameken.co/kk/course-bastau sıltemesıne jükteidı. Oqu merzımı – 21 kün. Därısterdı käsıbi daiyndalǧan biznes jattyqtyruşylar oqidy.
Şymkent qalasy äkımınıŋ baspasöz qyzmetı
