Qazaq radiolary serıktestıgıne qarasty radioarnalar tyŋdarmandardy jaŋa mausymda tyŋ jobalarmen quantpaq. Qyrküiekten bastap "Qazaq" radiosy, "Astana" radiosy, "Şalqar" radiosy jäne "Klassik" radiosy äue tolqynynan 30-ǧa juyq jaŋa radiohabar şyǧady. Būl turaly "Adfrna" tılşısı «Qazaq radiolary» JŞS-na sılteme jasap habarlaidy.
Jaŋa mausymda Qazaq radiosy aqparattyq-tanymdyq baǧytqa, Şalqar radiosy ūlttyq kontentke basymdyq beredı. Būl byltyr bastalǧan jūmystyŋ jalǧasy jäne küzgı mausymda aşylatyn jaŋa habarlar osy formatqa laiyqtalyp aşylǧan. Qazaq radiosynan tyŋdarmandarǧa türlı sala boiynşa keŋes beretın, «qoǧam ünıne qūlaq asatyn ükımet» tūjyrymdamasyn jüzege asyruǧa baǧyttalǧan interaktivtı habarlar aşylady. Mäselen, «Aqşa mäselesı» habarynda - memlekettık tūrǧyn-üi baǧdarlamalarynyŋ tetıkterı men aqşany bank depozitterınde dūrys saqtau, balanyŋ bılım aluyna osy bastan qarjy jinau, qarjy pirammidalaryna aldanudan abai bolu joldary tyŋdarmanǧa jan-jaqty tüsındırıledı. Al «Jan älemı» jaŋa habarynda koronavirus pandemiiasyna bailanysty nemese tūrmystyq problemalarmen psihoemosionaldy küizelıske tüsken tyŋdarmanmen psiholog maman tıldesedı. Būdan bölek tyŋdarmandarǧa zaŋger men därıger keŋesı, auyldaǧy käsıbın keŋeitemın degen şarualarǧa agrarlyq saladaǧy memlekettık qoldau tärtıbın tüsındıretın interaktivtı radiohabarlar efirge şyǧady. Altyn qordan Aitys, äuezdı äuen, jedel jaŋalyq, saiasi sūhbat jäne jyldar boiy halyq jadynda qalǧan habarlar da jalǧasyn tabady.
Al Şalqar radioarnasynan qyrküiek aiynda ūlttyq ruhaniiat baǧytyndaǧy jaŋa 12 joba äue tolqynyna şyǧady. Onyŋ ışınde Abai Qūnanbaiūylynyŋ 175 jyldyǧyna arnalǧan «Abai ūlaǧaty», Äl-Farabidıŋ 1150 jyldyq mereitoiy qarsaŋynda traktattary negızınde äzırlengen audiorolikter, teatr önerı jaily «Sahna», muzeiler men qolöner turaly «Jädıger», halyq muzykasyna arnalǧan «Än şaşu» radiohabarlary bar.
Jaŋa mausymnyŋ taǧy bır jaŋalyǧy Qazaq radiosy men «Şalqar» radiosy efirge jaŋa audiobezendırumen şyǧady. Är radioarnanyŋ tek özıne täne erekşelıgı bolyp sanalatyn efirdegı djingldar men saǧat basynda soǧatyn audiorolikter töl tuyndy retınde qaita jasalǧan.
Mysaly, Qazaq radiosynyŋ efirı belgılı kompozitor, «Balalyq şaǧymnyŋ aspany», «Abai», «Mūstafa Şoqai», «Äbılqaiyr», «Aldar Köse», «Şal» sekıldı üzdık kinofilmderı saundtregınıŋ avtory, filosofiia-psihologiialyq baǧytta erekşe melodiialyq stilı bar Quat Şıldebaevtyŋ tuyndylarymen bezendırıldı.
Al Şalqar radiosynyŋ efirın belgılı sazger Halyq Rizabek jetıgen, syrnai, qobyz sekıldı ūlttyq aspaptar arqyly jazyp alynǧan ekskliuzivtı audioroliktermen äsemdedı.
Astana jäne Klassik radioarnalary da küzgı mausyda öz tyŋdarmandaryna Elorda ömırıne qatysty jaŋa jobalar men akademiialyq muzykaǧa qatysty, Abaidyŋ än mūrasyna qatysty radiohabarlardy äue tolqynyna şyǧarady.
Jaŋa mausym qarsaŋynda studiiadaǧy mikrofondar men diktofondar da alǧaş ret radio stilınde bezendırıldı. Sondai-aq Qazaq radiosynyŋ Almaty studiiasy beinekameralarmen jabdyqtalady. Būl studiiadan tıkelei efirde şyǧatyn habarlardy radionyŋ äleumettık jelıdegı paraqşalarynan körsetuge mümkındık beredı.
https://youtu.be/1HRd0CI2OnA
"Adyrna" ūlttyq portaly
