Memleket basşysy Qasym-Jomart Toqaev keşe Qazaqstan halqyna arnaǧan Joldauynda auyl äkımderın sailau qajettıgın aitty.
– «Qoǧamdyq pıkır saualnamalary auyl äkımderınıŋ sailau arqyly qyzmetke keluıne qatysty sūranystyŋ artqanyn körsetıp otyr. Būl maŋyzdy qadamdy jan-jaqty oilastyryp, däiektı türde jüzege asyrǧan jön. Mūndai jüienıŋ qalai jūmys ısteitının naqty bıluımız kerek. Alaida, būl mäselenıŋ şeşımın keiınge qaldyruǧa bolmaidy. Kelesı jyly bırqatar auyldyq okrug äkımderınıŋ ökılettık merzımı aiaqtalady. Auyl äkımderınıŋ tıkelei sailauyn ötkızuge bolady dep oilaimyn. Jergılıktı bilık ökılderınıŋ sailanbaly boluymen qatar, memlekettık basqaru deŋgeilerı arasyndaǧy qūzyretterdı bölu jäne jergılıktı özın-özı basqaru ısın aiqyndap aluymyz qajet», – dedı Prezident Toqaev öz Joldauynda.
Bıraq osy jerde bır närsenı eskergen jön. Auyl äkımın sailau Mäjılıs deputatyn nemese «Nūr Otan» partiiasyna dauys beru emes. Auyl äkımınıŋ statusy erekşe. Ol halyqtyŋ däl ortasynda, elmen bırge tıkelei jūmys ısteidı. Būl – airyqşa nazar audarudy qajet etetın basqaru jüiesı. Sondyqtan Prezident aitqandai, ony «jan-jaqty oilastyryp, däiektı türde jüzege asyrǧan jön».
Ol üşın eŋ aldymen būl jüienıŋ zaŋdyq jaǧyn rettep alǧan tiımdı. Naqty aitqanda jergılıktı özın-özı basqaru zaŋy kerek. Atalǧan zaŋda auyl äkımı qanşa jylǧa sailanady, onyŋ merzımı de naqty körsetıluı tiıs. Olai bolmaǧan jaǧdaida jergılıktı jerde de kışıgırım «biurokrat akimchikter» paida bolady.
Ras, auyldyq jerde aǧaiynnyŋ bırlıgı myqty. Rulyq, tuysqandyq yntymaq ta küştı. Sondyqtan aldymen auyl äkımıne kım ūsynylady, mūny da jan -jaqty rettep alǧan dūrys. Qyryq rudan tūratyn auyldar bar. Eger ümıtkerlerdıŋ arasynda aǧaiynnyŋ bır adamy bar bolsa, ärine rulyq müdde röl oinap ketetını de jasyryn emes. Auyl äkımın sailaudyŋ alǧaşqy jyldarynda ras traibalistık müdde basym boluy mümkın. Sodan keiın ǧana baryp, eldıŋ közı jetkennen keiın ǧana auyl äkımın qabıletıne, belsendılıgıne qarai taŋdau bastalady.
Bıraq būl kezeŋnen bız ötuge tiıspız. Būl da – demokratiialyq sailau. Sondyqtan ruşyldyqtan qorqyp, demokratiialyq sailaudy keiınge qaldyruǧa bolmaidy. Rulyq emes, eldı ūlttyq müdde bırıktıretının halyq da aqyryndap tüsıne bastaidy. Sondyqtan auyl äkımın de sailau kerek. Bıraq kımdı ūsynamyz, mäsele osynda. Öitkenı aldaǧy uaqytta auyl äkımınıŋ öz biudjetı bolady. Tek oilandyratyny, biudjetı bar äkım biurokrat bolyp ketpese...
Būl jerde «aǧaiynnyŋ emes, auyldastyŋ taiy ozsyn» degen qaǧidamen ömır sürıp, barşa jūrttyŋ auyldy körkeituge üles qosqany abzal. Sonda ǧana el kögeredı. Yntymaq artady. Endeşe rudyŋ emes, auyldyŋ, auyldastyŋ jaǧdaiyn oilaiyq.
Erkın QALDAN,
«Adyrna» ūlttyq portaly
