Qytaidan qaşyp kelgen qos qandasymyz Mūrager ÄLIMŪLY men Qaster MŪSAHANŪLYNYŊ qazan aiynda «Pana ızdeuşı tūlǧa» kuälıgınıŋ merzımı aiaqtalady. Sodan keiın jaǧdai qalai bolmaq? Aldaǧy uaqytta ekı qandasymyz bosqyn märtebesın aluy mümkın be? Qazaqstanda qala ma? Osy sūraqtar boiynşa «Adyrna» tılşısı ekı azamattyŋ advokaty Läzzat Ahatovaǧa habarlasqan bolatyn.
– Bosqyn märtebesın ala alǧan joq dep kesıp aitatyndai ol mäsele älı qaralǧan da joq qoi. Karantinge bailanysty uaqytşa ūzartyldy. Qyrküiekte komissiia müşelerı jinalady, sonda qaraimyz dep aityp jıberdı. Öitkenı sol kezeŋ virustyŋ qatty örşıp tūrǧan, ekınıŋ bırı kovidpen auyryp, el basqa şaruanyŋ bärın tastap, janymen arpalysyp jatqan qiyn kezeŋ edı. Künıne pälenbai arystarymyz bırınen soŋ, bırı ketıp jatqan qaiǧydan köz aşpaǧan merzımge tap boldyq..Türmeden 22-de bosasa, artynşa bes künnen keiın, kuälık merzımderı de aiaqtalyp jatty. Qūjattary Öskemennen (ŞQO köşı-qon Departamentınen) Kökşetauǧa (Aqmola obl. migrasiiaǧa) kelıp te ülgermegen kezde bosqyndyq berıle salmady dep ökpeleu - logikaǧa da syimaityn närse edı. Qytaiǧa qaitaratyn nietterı bolsa (memlekettıŋ), Sairagülge otkaz bergendei (oǧan üşınşı rette kuälık merzımın sozuǧa otkaz bergen) törtınşı ret sozbas edı dep oilaimyn,- deidı advokat Läzzat AHATOVA.
Bosqyn märtebesı berılmegen künde jaǧdai qalai bolady? Ekı azamat deportasiialana ma degen mäselege de Läzzat hanym jauap berdı:
– Eldıŋ bırazy “oibai, Evropaǧa ketpese bolmaidy”- baibalam salyp jatyr. Evropaǧa ketudıŋ öz tärtıbı, zaŋdy prosedurasy bar ǧoi. Aldymen būl ekı jıgıt Qazaqstannan bosqyndyq sūrady. Sol elde ol mäsele qaralyp, otkaz berılse ǧana, basqa elderden bosqyndyq sūrap, ol elderdıŋ bırı qabyldasa ǧana kete alady. Sol sebeptı bosqyndyq turaly aryz qaralyp, komissiia şeşımı şyqpaiynşa, pälen-tügen dep bal aşu artyq. Ol aryzdary tūrǧylyqty meken-jailary boiynşa Aqmola oblystyq köşı-qon basqarmasynda arnaiy jasaqtalǧan komissiiamen qaralady. Al Qazaqstan bosqyndyq beruden bas tartsa, basqa elderden bosqyndyq sūrau turaly hatty men sonau qysta, ıs sotqa ketpei jatyp, tergeu barysynda-aq BŪŪ-na jıberıp, jauap alyp qoiǧanmyn. Ony feisbukte jariialadym da. Onda būl mäselenıŋ aldymen Qazaqstanda qaralu kerektıgın, ol el bosqyndyqty beruden bas tartsa ǧana, kömek bere alatyndyǧy aitylǧan. Sol kezderde respublikalyq şekara qyzmetı basşysy Dılmanovtyŋ ekıūşty sūhbaty şyǧyp, küdık köbeigen uaqyt bolatyn. Men sol uaqytta BŪŪ-ǧa hat joldadym. Ony jıgıtter de, basqalar da jaqsy bıledı. Endı ne sebeptı bükıl älem pandemiiamen alysyp, jandarymen arpalysyp jatqanda, olai baibalam salyp jatqany, ol kısılerdıŋ tüpkı nietterı maǧan jūmbaq..
Foto Jas alaş saitynan alyndy
Aǧyn AIDYN,
«Adyrna» ūlttyq portaly
