Ózin-ózi basqaramyn deýshilerge kúndelikten artyq kómekshi tabylmaıdy. Óıtkeni, kúndelik jazý – ózińe-óziń esep berýmen teń. Kúndelik júrgizý úshin arnaıy erejeler kerek emes. Biraq, keıbir adamdar arnaıy qoıyn dápter satyp alǵanymen, neden bastaryn bilmeı dal bolady. Ondaı jaǵdaıda sizderge birneshe keńes usynamyz:
Aldymen, barynsha ashyq bolyńyz. Eger óz kúndeligińizde de ózińizge shekteý qoısańyz, qarapaıym adammen jasalatyn dıalogtan aıyrmasy bolmaıdy. Jazyńyz. Birtúrli oılaryńyzdy, qııalyńyzdy, syrtqa shyǵarýdan jasqanatyn nárseniń barlyǵyn jazyńyz.
Ekinshiden, qaǵazǵa túsirilgen jáne sanańyzda qalǵan oı eki túrli. Qaǵazǵa túsirilgen oıdy shyndyqqa aınaladyrýǵa bolady. Al, sanadaǵy oı myń oıdyń arasynda jasyryn qalady.
Úshinshiden, kún saıyn jazyńyz. Ýaqytyńyz bolsa, bir saǵatyńyzdy arnasańyz bolady. Al, ýaqytyńyz tyǵyz jaǵdaıda, 10 mınýttyń ózi jetkilikti.
Kúndeliktiń tıgizer paıdasyn birneshe jaqtan qarastyraıyq:
Psıhologııalyq turǵydan:
Adamdar óziniń ishki álemine jıi úńile bermeıdi. Ózindik saraptama jumysy ózińizdi túsinýge, sezinýge, qundylyqtardy uǵynýǵa múmkindik beredi. Al, ony iske asyrý úshin kúndelik kerek. Ol – qandaı sezimder sezinemiz, ózimizdiń is-áreketimizdiń shynaıy sebebin bilý úshin taptyrmas kómekshi.
Shyǵarmashylyq turǵydan:
Eger jazý, syzý, sýret salý sekildi jumystar sizdiń súıikti isterińizdiń qataryna ense, kúndelik bul qabiletterdi jetildirýge múmkindik beredi. Kúndelikke súıikti zattaryńyz ben sizge shabyt syılaıtyn nárselerdi jazyńyz. Eger ylǵı jaǵymsyz oılardy jazsańyz, bul baǵyttan aýysyńyz.
Zııatkerlik turǵydan:
Oıdy qaǵazǵa tirkeý bul zııatkerlik qabiletti damytý. Siz oıyńyzdy tirkegen saıyn, este saqtaý qabiletińiz jetiledi.
"Adyrna" ulttyq portaly
