12 qyrküiek künı Qazaqstan Prezidentı Qasym-Jomart Toqaev QHR Memlekettık keŋes müşesı, Syrtqy ıster ministrı Van İdı qabyldady, - dep habarlaidy «Adyrna» ūlttyq portaly Aqordaǧa sılteme jasap.
Taraptar ekıjaqty yntymaqtastyqtyŋ qazırgı jaǧdaiy men perspektivalaryn, halyqaralyq jäne öŋırlık ūiymdar aiasyndaǧy yqpaldastyqty, COVID-19 ındetınıŋ taraluyn boldyrmau jönındegı ıs-qimyldardy üilestıru mäselelerın talqylady.
Qasym-Jomart Toqaev tyǧyz saiasi dialogqa jäne özara tiımdı sauda-ekonomikalyq yntymaqtastyqqa negızdelgen qazaq-qytai qatynastarynyŋ damu qarqyny men dostyq bailanystardy joǧary baǧalady.
Memleket basşysy ekonomikanyŋ türlı salalaryndaǧy investisiialyq jobalardy, sonyŋ ışınde, auyl şaruaşylyǧy baǧytyndaǧy jobalardy jüzege asyrudyŋ maŋyzdy ekenın atap öttı. «Qazaqstandyq önım öndıruşılerdıŋ auyl şaruaşylyǧy boiynşa Qytaiǧa eksporttaityn önımderınıŋ, atap aitqanda dändı jäne maily daqyldardyŋ nomenklaturasy ülken».
Prezident jan-jaqty strategiialyq serıktestıkke qosymşa serpın beru maqsatymen QHR Töraǧasy Si Szinpindı Qazaqstanǧa saparmen keluge şaqyrǧanyn naqtylady.
Van İ öz kezegınde Qytai basşysynyŋ jyly lebızı men auyzşa sälemdemesın jetkızdı. Si Szinpinnıŋ aituynşa: «Qazaqstan - aimaqtaǧy maŋyzdy strategiialyq serıktes jäne Qytai ekı el halyqtarynyŋ igılıgı jolynda özara yntymaqtastyqty jan-jaqty nyǧaituǧa äzır».
Qytai diplomaty «QHR basşylyǧy QR Prezidentı jariialaǧan Qazaqstan qoǧamynyŋ qajettılıkterın eskere otyryp, saiasi jäne äleumettık-ekonomikalyq jaŋǧyrtularǧa baǧyttalǧan reformalardy qūptaidy» dedı.
Sonymen qatar Van İ QHR-dıŋ ekıjaqty kün tärtıbınıŋ maŋyzdy bölıgı bolyp tabylatyn Qazaqstanmen sauda-ekonomikalyq bailanystardy keŋeituge zor köŋıl böletının atap öttı. Osy oraida Van İ Qazaqstan delegasiiasyn Qytaida ötetın EKSPO Halyqaralyq import körmesıne qatysuǧa şaqyrdy.
Äŋgımelesu barysynda taraptar halyqaralyq özektı mäseleler boiynşa, atap aitqanda, koronavirus infeksiiasyna qarsy ıs-qimyl salasyndaǧy yntymaqtastyq jönınde de pıkır almasty. Memleket basşysy Qytai tarapyna uaqytyly körsetılgen gumanitarlyq jäne medisinalyq kömek üşın alǧys bıldırıp, pandemiiaǧa qarsy küreste bırlesken şara qoldanuǧa äzır ekenın aitty.
Kezdesu soŋynda taraptar ūzaq merzımdı jan-jaqty strategiialyq ärıptestıktı odan ärı nyǧaituǧa daiyn ekenderın bıldırdı.
«Adyrna» ūlttyq portaly
