Toŋazytqyştaǧy bala ölımı: kuäger tırı närestenı öz közımen körgenın aitty

Atyrauda toŋazytqyşqa tırı balany salu ısı boiynşa sot prosesınde perinataldyq ortalyqtyŋ törtınşı jäne besınşı qabatynyŋ dälızınde ornatylǧan baqylau kameralarynyŋ beinejazbalary zerttelıp jatyr Kezektı otyrysta 2019 jyly 29 qyrküiekte tüskı saǧat bır men keşkı on arasyndaǧy video qaraldy. Mūnyŋ aldynda aiyptaluşylardyŋ advokaty videonyŋ uaqyty özgertılgen boluy mümkın ekenın bırneşe ret mälımdegen edı, dep jazdy öŋırlık Aq Jaiyq basylymy. Būǧan deiın kuäger retınde jauap bergen perinataldyq ortalyqtyŋ sanitary Svetlana Kozlova sotqa qaita şaqyrtyldy. Advokattardyŋ aituynşa, onyŋ būǧan deiın bergen jauabynda qaişylyqtar bar. Sondyqtan ordinator bölmesı, bosanu zaly, akuşerlık qūraldar öŋdeletın bölme jäne as üi ornalasqan 5-qabattaǧy beinejazbany qarau barysynda qaitadan jauap alu kerek dep sanaǧan. Sol künı Kozlova as üide jūmys ısteidı. Onyŋ aituynşa, keşkı saǧat 18.30-da akuşer Jämila Qūlbatyrova as üige kırıp, akuşerlık qūraldar öŋdeletın bölmedegı jaŋa tuǧan närestege qaraudy sūraǧan. Qūlbatyrova şaqalaqty №1 bosanu palatasynan osy jerge alyp kelıptı. Bölmege ekeuı bırge kırgen kezde Kozlova tırı balany köredı. "Balaǧa qaradym da, onyŋ tırı ekenın aittym. Nege ony jansaqtau bölımıne aparmaǧanyn sūradym", - deidı Kozlova. Onyŋ aituynşa, bala esık jaqqa qarap jatqan, ernı men qol-aiaǧy qimyldaidy. Videodan bölmede akuşer Elvira Nasihatovanyŋ da bolǧany körınedı. Kozlova oǧan nazar audarmaǧanyn, ekı közı balada bolǧanyn aitty. Onyŋ sözınşe, Nasihatova kabinette qūraldardy tazalap tūrǧan. Sot barysynda Qūlbatyrova Kozlovadan "Saǧan balanyŋ tırı ekenın aittym ba?" dep sūrady. "Jämila apa, sız as bölmege kelıp, närestenı mäiıthanaǧa jıbere almaitynyŋyzdy aittyŋyz. "Bala tırı me eken, qaraşy" dedıŋız. Men sol jerge baryp, balanyŋ tırı ekenın kördım, nege reanimasiiaǧa jıberılmegenın sūradym. Sız balanyŋ jüregı toqtap qalǧanyn, bıraq miy älı jūmys ıstep tūrǧanyn aittyŋyz. Men ündegen joqpyn. Sız bölmeden Asqar Jänıbekūlyn (Asqar Qaiyrjan - sottaluşy, akuşer-ginekolog) alyp kelu üşın şyǧyp kettıŋız. Balanyŋ jaialyǧyn ūstap körıp edım, ol jiyryldy. Şamamen on minuttan keiın Asqar Jänıbekūly keldı. Onyŋ artynda tūryp, balanyŋ tırı ekenın aittym. Asqar Jänıbekūly esıktı jap dedı, men japtym. Sız özıŋız de balanyŋ tırı ekenın kördıŋız ǧoi", - dep jauap berdı Kozlova. Al akuşer Qūlbatyrova mūndai äŋgıme bolmaǧanyn, balanyŋ qimylsyz jatqanyn aitty.