Bızde qos azamattyǧy barlar az emes eken

Qazaqstanda qos azamattyǧy bar 284 adam anyqtaldy, dep habarlaidy «Adyrna» ūlttyq portaly  QazAqparatqa sılteme jasap. IIM Köşı-qon qyzmetı memlekettık organdarmen bırlesıp, Qazaqstanda qos azamattyǧy üşın jauaptylyqqa tartylǧan 284 būrynǧy azamatty anyqtady. «Azamattyǧynan aiyrylǧan adamdar bola tūra, tärtıp būzuşylar Qazaqstan Respublikasyna kelu jäne tūru üşın qazaqstandyq qūjattardy paidalandy. Olardyŋ bırqatary şet memlekettıŋ azamattyǧyn qabyldaǧany turaly uaqtyly habarlamaǧany üşın äkımşılık jauapkerşılıkke tartyldy. Osy zaŋ būzuşylyqtar üşın 266 adamǧa ( 277 800 teŋgeden 555 myŋ teŋgege deiın) aiyppūl salynyp, 18 adam elden şyǧaryldy. Jaza taǧaiyndau turaly şeşımdı sot organy qabyldaidy», delıngen habarlamada. Halyqaralyq kelısımder qos azamattyqty boldyrmau jönındegı jūmysty jeŋıldetedı, öitkenı ekınşı taraptyŋ azamattyǧyn alu turaly mälımetterdı Qazaqstan qysqa merzımde alady. «Soŋǧy 2 jylda IIM-nıŋ bastamasymen köşı-qon salasynda 23 halyqaralyq kelısımge qol qoiyldy. Olardyŋ 5-uı köşı-qon salasyndaǧy yntymaqtastyqty retteidı (Äzerbaijanmen, Belaruspen, Qyrǧyzstanmen, Täjıkstanmen, Özbekstanmen), 15-ı adamdardyŋ readmissiiasy mäselelerın retteidı (Belarus, Majarstan, Germaniia, Qyrǧyzstan, Latviia, Litva, Moldova, Norvegiia, Polşa, Resei, Täjıkstan, Özbekstan, Chehiia, Şveisariia jäne Beniliuks elderı) jäne 3-ı azamattardyŋ Taraptar aumaǧynda bolu tärtıbın aiqyndaidy (Äzerbaijan, Qyrǧyzstan, Täjıkstan)», delıngen habarlamada. Kelısımdermen zaŋsyz köşı-qonǧa qarsy ıs-qimyl salasynda aqparat almasu tärtıbı retteldı, köşı-qon zaŋnamasyn būzuşylardy basqa elderge beru turaly mäsele şeşıldı. Sondai-aq şeteldıkterdıŋ Qazaqstanda bolu merzımderı retteldı. Vedomstvonyŋ mälımetınge, qazır köşı-qon salasyndaǧy taǧy 9 kelısım (Armeniia, Vetnam, Gruziia, QHR, Moldova, Resei, Türkiia, Ukraina, Fransiia) kelısu men qaralu üstınde. Foto aşyq derekközden alyndy.