Búgin Shymkent qalasynyń ákimi Murat Áıtenov áýesqoılar arasynda shaǵyn fýtboldan ótken Qazaqstan chempıonatynda jeńiske jetken «Standart» fýtbol komandasynyń múshelerin qabyldady.
Shahar basshysy fýtbolshylardy el chempıony atanýymen quttyqtap, olarǵa buqaralyq sportty damytýǵa úles qosqany úshin alǵys aıtty.
—Áýesqoılar arasyndaǵy fýtbol — buqaralyq sporttyń meılinshe keń taralǵan, tanymal túri. Sondyqtan Sizderdiń jeńisterińiz barsha shymkenttikter úshin eleýli oqıǵa dep bilemin. Sport – densaýlyq kepili. Jas urpaqtyń deni saý bolsa, ultymyz árqashan básekege qabiletti bolmaq. Sol sebepti búginde memleket buqaralyq sporttyń damýyna, jastardyń salaýatty ómir saltyn ustanýyna barynsha jaǵdaı jasap otyr, — degen Murat Dúısenbekuly bıyl Shymkentte 27 Street-workout alańy salynǵanyn atap ótti.
Murat Áıtenov qazir qala turǵyndarynyń 28 proenti sport jáne dene shynyqtyrýmen turaqty túrde aınalysatynyn, osy kórsetkishti Prezıdent tapsyrmasynda aıtylǵandaı, 30 proentke jetkizý maqsatynda aýqymdy jumys atqarylyp jatqanyna toqtaldy.
Qala ákimi komandanyń jeńiske jetýine bapkerler Sabyrjan Bekpaev pen Hýsan Ýtametovtiń de zor úles qosqanyn aıtyp, olarǵa sáttilik tiledi.
Sonymen qatar «Standart» komandasynyń aldaǵy ýaqytta Ýkraınada ótetin shaǵyn fýtboldan áýesqoılar arasyndaǵy álem chempıonatynda el namysyn laıyqty qorǵaıtynyna senim bildirdi.
Kezdesýdiń sońynda ákim bapkerler men fýtbolshylarǵa Alǵys hat pen arnaıy syılyqtar tabys etti.
Shymkent qalasy ákiminiń baspasóz qyzmeti
