Bıyl Shymkent qalasynda óz kásibin bastaýshylarǵa «Bastaý bıznes» jobasy aıasynda 1 491 memlekettik grant berý josparlanǵan. Búgingi kúnge deıin 1 420 adamǵa grant berilgen. Onyń 901-i az qamtylǵan otbasylardyń músheleri. Al, 90-y kópbalaly analar. Taǵy 306 adam az qamtylǵan jáne kópbalaly otbasylardyń músheleri.
1 qyrkúıekten bastap memlekettik grant sany kóbeıdi. Qosymsha 3 423 adamǵa memlekettik grant úılestirýge qarjy qarastyrylǵan.
Atalǵan 3 423 orynǵa az ýaqyt ishinde 7 myńǵa jýyq qala turǵyny qujat ótkizdi. Olardyń qujattary komıssııanyń qaraýyna usynylǵan. Máselen, bıyl 1-2 qyrkúıek kúnderi ótken komıssııa otyrysynda 1 022 adamnyń ótinishi boıynsha oń sheshim qabyldanyp, olarǵa memlekettik grant taǵaıyndaldy. Onyń ishinde búgingi kúnge deıin 500 úmitkerge grant qarjysy aýdarylyp úlgergen.
Aıta keteıik, «Bastaý bıznes» jobasy — nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy sheńberinde júzege asýda. Joba aıasynda óz bıznesin bastaǵysy keletin azamattar kásipkerlik negizderine tegin oqytylady. Pandemııaǵa baılanysty bıyl oqý onlaın rejımde ótýde. Oqý merzimi — 21 kún. Qatysýshy oqýyn támamdaǵan soń arnaıy test tapsyrady. Eger jaqsy nátıje kórsetse, oǵan oqýdy bitirgeni týraly sertıfıkat beriledi.
Sol sertıfıkatty alǵan adamnyń grantqa úmitker atanýǵa quqyǵy bar. Grant qaıtarymsyz beriledi. Biraq monıtorıngtik top grant qarjysynyń maqsatty jumsalýyn tekserip otyrady. Iaǵnı, bul óz kásibin bastaýshy azamattarǵa berilgen biregeı múmkindik. Osy oraıda bıyldan bastap az qamtylǵan otbasylar men ataýly áleýmettik kómek alatyn kópbalaly otbasylardyń músheleri, qonys aýdarýshylar men qandastar «Bastaý bıznes» jobasynyń sertıfıkatynsyz da grantqa tikeleı úmitker bola alatynyn aıta ketken jón.
Shymkent qalasy ákiminiń baspasóz qyzmeti
