Bala kezdegi dosyn pyshaqtap óltirip, denesin úıindegi jerqoımaǵa kómip tastaǵan Vıtalıı Valıtov 11 jylǵa sottaldy, dep habarlaıdy «Adyrna» ulttyq portaly «Astana TV» arnasyna silteme jasap.
Oral sotynda keltirilgen derekterge qaraǵanda, eski dostar esik aldynda araq ishken. Keıin ekeýi sózge kelip qalyp, Vıtalıı Valıtov qurdasyn uryp qulatqan jáne moınyna eki ret pyshaq salǵan. Artynan máıitti jerqoımaǵa túsirip kómip tastapty.
«Ekeýi de bala kúninen birge ósken jigitter ǵoı. Biraq qylmysty bizden jasyrǵanyn bilgende qatty ashýlandyq. Endi ony ózimiz aıap, keshirim berip otyrmyz. Óıtkeni artynda kishkentaı balasy bar»,-dedi marqumnyń týysy Elena BATAEVA.
Sotta Valıtov qylmysyn tolyq moıyndap, qaza bolǵan dosynyń týystarynan keshirim surady. Sýdıa ókingen qylmyskerdiń kámelettik jasqa tolmaǵan qyzyn baryn eskere otyryp, ony 11 jylǵa bas bostandyǵynan aıyrdy.
«Adyrna» ulttyq portaly
