Kúni keshe memleket basshysy Qasym-Jomart Toqaevtyń qatysýymen Ulttyq Keńestiń kezekti otyrysy ótti. Alqaly jıynda prezıdent Soltústik Qazaqstan oblystaryn qazaqylandyrý jumystaryna nazar aýdardy. Alaıda, Myrzantaı Jaqyp teriskeıdi qazaqylandyrý jumystarynyń áli de bolsa kemshin bolyp jatqanyn aıtady.
Memleket basshysy shetten kelgen qandastar soltústikke kelse, birden úı berý kerektigin aıtty. Bul – óte mańyzdy dúnıe. Sondaı-aq prezıdent ishki kóshi-qon boıynsha ár azamatqa beriletin qarjyny 35 AEK-ten 70 AEK kóterý týraly tapsyrma berdi.
Manash Qozybaev atyndaǵy Soltústik Qazaqstan ýnıversıteti Ǵylym departamentine qarasty Ǵylymı-ádistemelik jáne patenttik-lıenzııalyq bóliminiń jetekshisi Myrzantaı Jaqyptyń aıtýynsha, prezıdenttiń Ulttyq keńeste aıtqan sózinen keıin kóshi-qonǵa baılanysty másele ózdiginen sheshilip ketpeıdi. Budan bólek ol ár azamatqa beriletin qarjyny 35-ten 70 AEK kóbeıtkennen eshteńe ózgermeıtinin eskertti.
«Negizi qalaly jerge kóship kelgen azamatqa 35, al aýyldy jerge barǵan azamatqa 25 AEK qarjy tólenedi. Bir AEK 2778 teńge bolsa, 70 AEK 194 460 teńge bolady eken. Al aýyldy jerge kóship baratyn azamatqa endi 50 AEK, ıaǵnı 138 900 teńge berýi múmkin. Shyn mánisinde, kóship kelýshilerge beriletin atalǵan qarjymen kóshi-qon máselesi oń jolǵa túspeıdi. Eń bastysy, kóship kelgen azamattarǵa jergilikti ákimshiliktiń kózqarasy ózgerýi kerek. Ákimshilik qarjyny bermes buryn azamattardan turaqty tirkeýdi talap etedi. Al turaqty tirkeýge turý soltústik Qazaqstan oblystarynda óte kúrdeli. Eń basty másele – qarajattyń kólemin kóterýde emes», – deıdi ol.
Myrzantaı Qojabaıulynyń aıtýynsha, qarjydan buryn azamattardy jumys jáne turǵyn úımen qamatasyz etý – mańyzdy. Óıtkeni, Jumyspen qamtý ortalyqtary syrttan keletin azamattardy jumyspen qamtý máselesine nemquraıly qaraıtyn kórinedi.
«Elbasynyń jan-jaqtaǵy zııaly qaýym ókilderin elordaǵa kóshirip ákelý týraly 2005-2007 jáne 2008-2010 jyldarǵa arnalǵan baǵdarlamasy bolǵan. Atalǵan baǵdarlama boıynsha – elimizdiń ár aımaǵyndaǵy azamattarǵa ózi turyp jatqan qalada úıi bolsa da, olarǵa elordadan úı berildi. Mine, sol sııaqty Petropavl qalasyna kóship keletinderdi úımen qamtamasyz etý kerek. Jıynda Qasym-Jomart Toqaev Elbasy sııaqty jalǵa páter berýdi jergilikti ákimshilikterge arnaıy tapsyrýy kerek edi. Sodan keıin memleket basshysy Jumyspen qamtý ortalyqtarynyń kóship kelgen adamǵa júgirip júrip jumys taýyp berýin tapsyrýy qajet edi. Ókinishke qaraı, olar jyly kabınetinen shyqpaı, kóship kelýshilerdi tirkegennen basqa eshteńe istep jatqan joq. Bir sózben aıtqanda, Prezıdent azamattardy páter jáne jumyspen qamtý máselesin sheshýdi tapsyrýy kerek edi. Áıtpese ár azamatqa 70 AEK turmaq 7000 AEK qarjy berse de, kóshi-qon máselesi sheshilmeıdi. Kóship kelgen adamǵa eń áýeli baspana, sosyn jumys kerek», – deıdi Myrzantaı Qojabaıuly.
Aıtpaqshy, Qasym-Jomart Toqaev jıynda «Serpin» jobasyna da mán berdi. Alaıda atalǵan jobanyń keler jyly jalǵasa ma, joq pa – ol jaǵy belgisiz.
«Prezıdent keshe «Serpin» jobasy týraly aıtty. Alaıda 2017-2020 jylǵa arnalǵan «Eńbek» baǵdarlamasy 2021 jylǵy aıaqtalady. Atalǵan baǵdarlamanyń ishine «Serpin» jobasy kiretin. Demek «Serpin» jobasy bıyl aıaqtalýy múmkin. Al memleket basshysy aıtqan tapsyrma iske asý úshin keshendi túrde jospar bolýy kerek. Jalpy kóshi-qon máselesin «Eńbek» baǵdarlamasyna qospaı, oǵan bólek baǵdarlama arnaý kerek. Uzyn sózdiń qysqasy, syrttan jáne ishten keletin oqýshylarǵa arnaıy baǵdarlama jasaý qajet», – deıdi Myrzantaı Jaqyp.
Prezıdent tapsyrmasynan keıin de kósh kólikti bolyp ketpesi anyq. Bul jerde jergilikti ákimshiliktiń ár qyzmetkeriniń bul iske qalaı qaraıtyny óte mańyzdy.
Serik JOLDASBAI,
«Adyrna» ulttyq portaly.
Foto ashyq derekkózden alyndy.
