Şymkent qalasynyŋ Eŋbekşı audany aumaǧynda jol jöndeu, aiaqjoldar jäne köpır qūrylys jūmystary jürgızılude.
Audanda ūzyndyǧy 613,2 şaqyrymdy qūraityn 611 daŋǧyl, köşeler men ötkelder ornalasqan. Audan boiynşa jol jöndeu jūmystaryn qajet etetın şaǧynaudandar men tūrǧyn alaptar zerdelengen. Bügınde 62 köşede ortaşa jöndeu (61,6 şaqyrym), 16 köşede aiaq jol salu (23,5 şaqyrym), 8,9 şaqyrymǧa şaǧal tas töseuge qarjy bölınıp, jöndeu jūmystary atqaryluda.
Audan äkımınıŋ mälımdeuınşe, negızınen şalǧai aumaqtardyŋ köşelerın asfalttauǧa basymdyq berılude. Jyl soŋynda asfalt jol 407,5 şaqyrym (66,5%), şaǧal tas jol 182,8 şaqyrym (29,8%), topyraq jol 22,9 şaqyrymdy (3,7%) qūraidy.
Onymen qosa, Eŋbekşı audanynda biyl bırqatar köpırdıŋ qūrylysyn jürgızu josparlanǧan. Bügınde Lenger tas jolyndaǧy «Sairam su» özenınıŋ üstınen ötetın köpırdıŋ jäne Qarabastau tūrǧyn alabyndaǧy «Badam» özenınıŋ üstınen ötetın köpırge qaita qūru jūmystary jürgızılıp, paidalanuǧa berıldı. Al Maiatas, Toǧys tūrǧyn alaptaryndaǧy «Badam» özenınıŋ üstınen ötetın jäne Eltai tūrǧyn alabyndaǧy köpırdıŋ qūrylysy jyl soŋyna deiın aiaqtalady.
Sondai-aq, būl jyly Lenger tas joly boiyndaǧy jaryqşamdar jöndeuden öttı. Jalpy 12,1 şaqyrym bolatyn 14 köşede jaryqtandyru jūmystary jürgızılude. Sonymen qatar 2021 jylǧa bırınşı kezekte jaryqtandyru jūmystaryn jürgızudı qajet etetın 28 köşenıŋ tızımı bekıtılgen.
Şymkent qalasy äkımınıŋ baspasöz qyzmetı
