Beısenbi, 5 qarasha kúni Aqtóbe oblysynyń ákimi Ońdasyn Orazalınniń qatysýymen «Aqtóbe» telearnasynyń 60 jyldyq mereıtoıyna arnalǵan shara ótti.
Mereıtoılyq jıynǵa oblys ákiminiń orynbasary M.Shermaǵanbet, «Aqtóbe Medıa» JShS dırektory R.Otynshın, telarna ujymy men ardagerleri, Jambyl jáne Mańǵystaý oblystarynan arnaıy kelgen oblystyq telearna basshylary B. Júsip, M.Álibekuly qatysty.
Aımaq basshysy alpys jyldyq asýdy eńsergen telearna ujymyn quttyqtap, osy salada kóp jyldar boıy eńbek etken jýrnalısterge alǵys hattar, mereıtoılyq sertıfıkattar men gúlshoqtaryn tabystady.
«Osydan 60 jyl buryn «Aqtóbe» telearnasynyń negizi qalanyp, alǵashqy aımaqtyq habarlar efırge shyǵa bastady. Osy jyldar ishinde qalyń jurtshylyqtyń qurmetine bólengen «Aqtóbe» telearnasynyń oblysymyzdyń rýhanı-mádenı, áleýmettik, saıası-qoǵamdyq qundylyqtarynyń damýyna, ulttyq sana-sezimniń qalyptasýyna qosqan úlesi ólsheýsiz. Zaman talabyna saı oń men solyńdy, aq pen qarany ajyratatyn ultjandy habarlardyń kórsetilýi urpaq sanasyna oı salary anyq. 60 jyl ishinde ár qazaqtyń tórinen oryn alǵan kógildir ekrannan san túrli qundy dúnıeler jaryq kórip, qalyń kórermenge jol tartyp keledi. Osy jyldar ishinde «Aqtóbe» telearnasy zııaly qaýymnyń rýhanı, mádenı oshaǵyna aınaldy. Qara shańyraqta ár jyldary eńbek etken aǵa býyn ókilderi kóptegen jas mamandardy tárbıelep, bolashaqqa baǵyt-baǵdar berip, jol siltedi. Ótkir oı, batyl pikir, tyń bastamalar kóterip, aımaqtyń túrli jańalyqtary men áleýmettiń muń-muqtajyn aıqyn kórsetetin televızııa mektebiniń qalyptasýyna atsalysty», - dedi oblys basshysy.
Aıta keteıik, búgingi kúni «Aqtóbe» telearnasynyń habarlary oblystyń 112 eldi mekenine taraıdy. Óńir halqynyń 98 paıyzy osy telearna arqyly kún saıyn beriletin respýblıka, qala jáne oblys kólemindegi jańalyqtar men túrli taqyryptardaǵy telebaǵdarlamalaryn kórip keledi. Elimizdiń batys aımaǵy boıynsha shoqtyǵy bıik telearnanyń biri sanalatyn «Aqtóbe» telearnasynda qazirgi zamanǵa laıyq sońǵy úlgidegi tehnıkalarmen jabdyqtalǵan 5 stýdııasy bar.
Sońǵy jyldary telearnanyń shyǵarmashylyq ujymynyń birlesken eńbeginiń nátıjesinen shyqqan rýhanı-mádenı, áleýmettik, saıası-qoǵamdyq máselelerdi kótergen ózekti baǵdarlamalary, suhbattary, avtorlyq habarlary men derekti fılmderi halyqtyń júreginen jol taýyp, qoǵam tárbıesine ózindik úlesin qosýda.
