Qazaqstan suy az tabiǧi kezeŋge kırdı. Būl turaly QR Ekologiia, geologiia jäne tabiǧi resurstar ministrı Maǧzūm Myrzaǧaliev aitty, dep habarlaidy «Adyrna» ūlttyq portaly «QazAqparatqa» sılteme jasap.
«Özen basseinderı boiynşa jürgızılgen taldauǧa säikes Qazaqstan suy az tabiǧi kezeŋge kırdı jäne 2019 jyly jalpy 83 şaqyrym tekşe metrge teŋ boldy. Aita ketetın jait, soŋǧy jyldary būl körsetkış 90-100 şaqyrym tekşe metr deŋgeiınde boldy. Osyǧan bailanysty, suarmaly jerler boiynşa jaǧdai qiyndady. Äsırese eldıŋ oŋtüstık oblystarynda qatty sezıldı. Öitkenı eldegı suarmaly alqaptardyŋ 90 paiyzy osy jaqtarda ornalasqan. Al respublika boiynşa qoldanysqa alynatyn sudyŋ 97 paiyzy oŋtüstık öŋırge tiesılı», - dedı ol Senat töraǧasynyŋ orynbasary Asqar Şäkırovtıŋ töraǧalyǧymen ötıp jatqan Ükımet saǧatynda. Onyŋ deregınşe, vegetasiialyq kezeŋnıŋ qorytyndysy boiynşa Almaty oblysynda ötken jyldarmen salystyrǧanda qar jamylǧysy 35 paiyz az boldy. Jambyl oblysynda sulylyq ortaşa köp jyldyq derekterden 15-20 paiyz tömen tırkeldı. «Osyndai problemalarmen bız Türkıstan jäne Qyzylorda oblystarynda tap boldyq. Alaida, su şaruaşylyǧynyŋ qolaisyz jaǧdaiyna qaramastan, Memleket basşysy būl mäselelerdı şekaralas elderdegı ärıptesterımen kezdesu kezınde kötergendıkten, su beru jospary 90-100 paiyzǧa oryndaldy. Sonymen qatar, kollektorlyq-drenajdyq sulardy qaita paidalanu praktikasy jürgızıldı», - dedı ministr.
Foto aşyq derekközden alyndy
«Adyrna» ūlttyq portaly
