Kele jatyr altyn Basy Keıkiniń…
Jaýdan jalǵyz –
Shahıd keshken deıtuǵyn,
Kele jatyr altyn Basy Keıkiniń;
Masaıraǵan onyń munda joǵynda,
Orman jurty qala bardy sońynda.
Keýdesinde qalyp qoımaı zar áni,
Mańdaı, sheke súıegine tarady;
Ata jaýdan kóńili qalǵan, qaıran, Bas
Art jaǵyna qaıyryla bir qarady…
Beles, beles, beles dep,
Aıdarynan sıpaǵandaı jel ıiskep;
Bas keledi toqsan jyldaı kórmegen,
Óz denesi
Óz kózine
Elestep!
Qasiretti qara túndi jamylyp,
Bas… keledi toqsan jyldaı toryǵyp,
Ór keýdesin!
Ókpe-baýyryn saǵynyp!
Ýlap-shýlap áleýmettik jeli kep,
Demin ishke tartqan kezde tóńirek,
Toqsan jyldaı eki kózi tórt bolǵan,
Torǵaı jurty qoıa berdi eńirep…
Bas keledi basa-kóktep ǵasyrdy,
Álıhan men izdep Qanysh…
Qasymdy;
Qaraı bermeı jaýtań-jaýtań tómenge,
Kókke qaraı kóter, qazaq, basyńdy!
Serik Aqsuńqaruly