Qazaqstanda «Bala näsıbı» atty järdemaqy engızu ūsynyldy

«Auyl» partiiasynyŋ müşelerı «Bala näsıbı» atty järdemaqy taǧaiyndaudy ūsyndy, dep habarlaidy QazAqparat tılşısı. «Auyl» HDPP ortalyq apparatynyŋ jetekşısı Quanyş Seiıtjanovtyŋ aituynşa, Qazaqstanda mūqtaj nemese mūqtaj emes dep bölmei, balalardyŋ bärıne bırdei järdemaqy taǧaiyndau kerek. «Halyqtyŋ amanat etken saualdarynyŋ bırı («El amanaty» saualnamasy) – äleumettık salada, är balaǧa järdemaqy taǧaiyndau turaly partiia ūsynyp otyrǧan bastama. Demek, qoǧamda būl problema būrynnan bar. Partiianyŋ būǧan deiıngı ötkızgen ıs-şaralarynda būl mäsele talqylanǧan. Ärine, qazırgı taŋda ana men balany qoldau salasynda äleumettık järdemaqynyŋ neşe türı joq emes – bar. Belgılı bır deŋgeide būl järdemaqynyŋ türlerı keide bır-bırıne qaişy kelıp te jatady. Mäselen, bır ǧana ana men balaǧa arnalǧan järdemaqy 14 türlı zaŋmen retteledı eken. Būl belgılı bır deŋgeide halyqty şatastyryp jatyr», - dedı Quanyş Seiıtjanov Ortalyq kommunikasiialar qyzmetınde ötken «Auyl» partiiasynyŋ baspasöz mäslihatynda. Onyŋ aituynşa, keiınnen taǧaiyndalǧan atauly äleumettık kömektıŋ de qaişylyqtary joq emes. «Mäselen, Qazaqstanda 776 myŋ adam atauly äleumettık kömektı alsa, sonyŋ 492 myŋy balalarǧa arnalǧan atauly äleumettık kömek eken. Bız nege balany jas künınen bırı äleumettık kömekke mūqtaj, ekınşısı mūqtaj emes dep böluımız kerek? Būl – ideologiialyq mazmūn tūrǧysynan da öte qate. Öitkenı bız balanyŋ janyn jasynan jaralaimyz. Mūny dana halqymyz «Är balanyŋ öz näsıbı bolady» dep bıraq auyz sözben aitqan. Bızdıŋ ūstanyp otyrǧan pozisiiamyz – 18 jasqa deiıngı balalardy äleumettık kömekke mūqtaj nemese mūqtaj emes dep bölmei, tölemaqy taǧaiyndau. Būǧan elımızdıŋ ekonomikalyq mümkındıkterı jetkılıktı. Būl ūsynysty kökten alǧan joqpyz. Saraptamanyŋ nätijesınde ūsynyldy. Äleumettık tölemge keler bolsaq, Asan men Üsennıŋ ertegısı eske tüsedı. Bala qaşan da - bala. Ol - bızdıŋ bolaşaǧymyz», - dedı ol. «Auyl» partiiasynyŋ müşelerı būl järdemaqyny «Bala näsıbı» dep ataudy ūsynyp otyr. Aita ketsek bügıngı baspasöz mäslihatynda «Auyl» HDPP töraǧasynyŋ bırınşı orynbasary Töleutai Raqymbekov «El amanaty» jalpyūlttyq saualnamasynyŋ nätijesın jariialaǧan bolatyn.