Gúlnar – túrki halyqtaryna ortaq esim. Qazaqta da, qyrǵyzda da, ózbekte te, túrikmende de, tatarda da, bashqurtta da, qaraqalpaqta da Gúlnarlar jetkilikti. Solardyń ishinde bul Gúlnardyń jóni bólek edi. Bashqurttyń birtýar boıjetkeni, ǵıbratty ǵalymy, áleýetti epostanýshysy Gúlnar Iýldybaeva máńgilik mekenine mezgilsiz attanypty. Jastyǵyna qaramastan túrki tildes elderge keń tanylǵan zerdeli zertteýshi irgeden kirip, ilgerilep kele jatqan indettiń daýylyna ushyrapty.
Gúlnar – bashqurt jurtynyń Jeruıyǵy ispetti, talaı tuǵyrly tulǵalar shyqqan áıgili Saıtbaba aýylynyń qyzy edi. Óz halqynyń epostyq shyǵarmalaryn jerine jetkize zerttep, akademııalyq úlgidegi ǵylymı eńbekter jazǵan-dy. Ásirese eldiktiń eskertkishi, erliktiń enshisi – «Ýral batyr» eposyn túrki álemine tanytýǵa ólsheýsiz eńbek sińirdi. Túrki tildes elderdegi áriptesteriniń alaqanǵa salyp aıalaǵan aıaýly qyzy bolatyn.
Talantty ǵalym ekeni óz aldyna, júreginiń jylýy mol, jany taza, júrgen jeri berekege toly armanshyl arý edi. Jurtty jatyrqamaıtyn, aǵaıyndy alalamaıtyn. Kúlli álemniń kúlkisin ezýine jınap, jymıyp qana turatyn. Baqyttylyqtyń belgisi bar-dy bashqurttyń bul qyzynda...
Qazaq ǵalymdarymen erekshe syılasty. Bizdiń elimizge degen qurmetinde shek joq-ty. Baǵzy dáýirden tamyr tartatyn árbir muramyzdy óz halqyna tanystyrýǵa asyǵatyn. Jalpy, túrki halyqtarynyń qasterli qundylyqtarynyń qaı-qaısysyn da bashqurt tiline aýdarýǵa asa yqylasty edi.
Sol Gúlnar búgin gúldestege oranyp, ózi de ásem gúlge aınalyp, jastaıynan jete zerttegen Ýral batyrdyń senimdi serigi – Aqbozatqa minip, ǵaryshqa jol tartty.
Hosh, sáýletti Saıtbabanyń sulýy! Alla aldyńnan jarylqasyn!
Iáneń ıánnáttá býlhyn, Gólnar!
Baýyrjan OMARULY,
Ádebıettanýshy-ǵalym, jýrnalıst-pýblııst
