Ań jáne balyq aýlaý maýsymy bastalǵannan beri (2020 jylǵy 1 qazan-22 qarasha) eldiń sý aıdyndarynda 12 adam, onyń ishinde 1 bala qaza tapty. Bul týraly Qazaqstan Respýblıkasy Tótenshe jaǵdaı mınıstrliginiń resmı ókili Talǵat Ýálı habarlady.
Tótenshe jaǵdaılar mınıstrliginiń aýmaqtyq bólimsheleri sý aıdyndarda adamdardyń (balyqshylardyń) qaza bolýynyń aldyn alý boıynsha reıdtik profılaktıkalyq is-sharalar ótkizedi. Reıd barysynda balyq aýlaý kezindegi qaýipsizdik sharalaryn saqtaý týraly aqparattyq jadynamalar taratyldy.
Balyq aýlaý kezindegi erejelerdiń saqtalmaýynan 11 adam qaza tapty jáne eresek adamdardyń qaraýynsyz qalǵan 1 bala abaısyzda sýǵa qulap mert boldy.
2020 jyly Aqmola, Almaty, Qostanaı, Qyzylorda, Mańǵystaý, Túrkistan oblystarynyń sý aıdyndarynda qaza bolǵandar tirkeldi.
Mysaly, ótken kúz-qys maýsymynda (2019 jylǵy 1 qazannan bastap 2020 jylǵy 1 naýryzǵa deıin) elimizdiń sý aıdyndarynda balyq aýlaý kezinde qaýipsizdik erejelerin buzý saldarynan, sondaı-aq muz ótkelderi arqyly ótý kezinde 37 adam (onyń ishinde 10 bala) qaza boldy.
Adamdardyń qaza bolýynyń negizgi sebepterine toqtalsaq, 19 adam balyq aýlaý kezinde jaǵalaýdan nemese júzý quraldarynan abaısyzda sýǵa qulap qaza bolǵan, 7 adam balyq aýlap júrip muz astyna túsip ketip ajal qushqan, 8 bala oınap júrip muz astyna qulap, qaza bolsa 2 bala sýǵa qulap kóz jumǵan, 1 adam muz ótkelderinen ótý kezinde qulap qaza tapqan.
Óńirler boıynsha alyp qarasaq, qaza bolǵandar Aqmola, Atyraý, Almaty, Aqtóbe, Shyǵys-Qazaqstan, Jambyl, Batys-Qazaqstan, Qostanaı, Qaraǵandy, Soltústik Qazaqstan oblystarynyń jáne Almaty qalasynyń sý aıdyndarynda tirkelgen.
Osyndaı qaıǵyly oqıǵalar bolmas úshin turǵyndardy sý aıdyndarynda, qys mezgilinde eń aldymen qaýipsizdik sharalaryn qatań saqtaýǵa shaqyramyz. Birinshiden qarańǵy kezde jáne aınala nashar kórinetin tumandy aýa raıynda muz ústine shyqpaǵan jón, ekinshiden juqa jáne qatty qatpaǵan muzǵa shyǵýǵa bolmaıdy, úshinshiden muzdyń belgili bir jekelegen aýmaqtarynda top bolyp jınalýǵa bolmaıdy, tórtinshiden muz ústindegi shuńqyrlarǵa, jaryqtarǵa, oıyqtarǵa jaqyndaýǵa bolmaıdy, avtokólikpen ótkeli joq jerlermen júrýge bolmaıdy. Osyndaı árbireýimizdiń qolymyzdan keletin qarapaıym ǵana saqtyq sharalaryna baǵyný arqyly, óz ómirimizdi qaýipten, qaıǵyly oqıǵadan qutqaramyz.
Sýdaǵy nemese muzdaǵy oqıǵalar kóbinese adamnyń óz-ózine sený, óz kúshteri men múmkindikterin qaıta baǵalaý, sýdaǵy (muzdaǵy) qarapaıym erejelerdi elemeý saldarynan oryn alyp jatady eken.
Erke Jomart,
«Adyrna» ulttyq portaly