Parlament májilisiniń 98 mandatyna 5 saıası partııanyń talasatyny belgili. 2021 jyldyń 10-shy qańtarynda ótetin saılaýdyń úgit-nasıhattyq jumysy bastalyp ta ketti. Osy rette «Adyrna» ulttyq portalynyń tilshisi «Adal» partııasynyń ókili Nazym Janǵazıevamen áńgimelesip, saılaýaldy daıyndyǵyn surap bildi.
–Nazym hanym, "Adal" partııasy baǵdarlamasynyń negizgi baǵyttary qandaı?
– «ADAL» partııasynyń baǵdarlamasy 5 negizgi baǵyttan turady:
1) Halyqtyń ómir súrý sapasyn kóterý;
2) Kásipkerlik – damyǵan memlekettiń irgetasy;
3) Agroónerkásiptik keshendi damytýǵa basymdyq berý;
4) Óńirlerdiń órkendeýi – qýatty memleket dińgegi;
5) Ómir súrýge qolaıly memleket.
–Partııa quramyna kóptegen isker jastardy jıyp jatyr. Olardyń qatarynda Maqsat Tolyqbaı, Ardaq Nazarov sekildi tanymal azamattar bar. Iaǵnı, partııa jastarǵa úmit artatyn sııaqty. Solaı ma?
–Koronavırýs pandemııasy bizge eski ádister búginde qajetsiz bolyp qalǵanyn túsinýge múmkindik berdi. Biz saıası landshaftta beıimdelgish, ıkemdi, kez kelgen ózgeristerge enip kete alatyn jastarǵa múmkindik berý qajet dep sanaımyz. Biz týrbýlentti ýaqytta ómir súrip jatyrmyz, sondyqtan qazir 5 jyl buryn belgilegen strategııalar men mindetter mańyzdy emes. Kún tártibin, jumys baǵytyn ózgertý qajet. Bul –ambıııasy mol jastardyń kúshimen ǵana júzege asady.
QR Parlamenti Májilisine depýtattyqqa kandıdattardyń 16-sy óz salasynyń sarapshylary. Jáne de olardyń árqaısysy óz qyzmet salasynyń damýyna zor úles qosyp keledi. Biz olardyń tájirıbesi «ADAL» partııasy qyzmetiniń barlyq baǵyttary boıynsha qoldanylatynyna senimdimiz.
- Ózge partııalarmen debatqa shyǵýǵa daıynsyzdar ma?
–Árıne, biraq kez-kelgen partııanyń ár múshesiniń belgili bir maqsaty bar. Eń bastysy, árbir qazaqstandyqtyń ómir súrý sapasyn jaqsartý. Sondaı-aq árbir qazaqstandyqtyń ıgiligi úshin jumys isteý. Biz eshkimdi synaı almaımyz. Ár partııanyń pikirin qurmetteımiz. Pikirtalasqa biz daıynbyz.
– Úgit-nasıhat jumystary resmı túrde bastaldy. Karantın talaptary saılaýshylarmen kezdesýge qanshalyqty áser etedi dep oılaısyzdar?
–Biz karantın sharalarynyń barlyq talaptaryn barynsha saqtaıtyn bolamyz. Biz úshin ár óńirge baryp, adamdarmen kezdesip, barlyq is-sharalarda qatysý óte mańyzdy.
Halyqpen kezdesýge sózsiz basymdyq beriledi. Biraq biz deni saý ult úshin kúsh salatyn «ADAL» partııasymyz. Bizdiń árbir keńselerimizde, pýnktterimizde sanıtarlyq talaptardy saqtaýǵa qajet nárseniń bári bolady: maskalar, sanıtaızerler, qolǵaptar. Áleýmettik araqashyqtyq mindetti túrde saqtalady.
- Pikirińizge raqmet!
Áńgimelesken Gúlvıra Asqarqyzy,
«Adyrna» ulttyq portaly
