Osydan ekı ai būryn elımızde Būqaralyq aqparat qūraldary men teleradio habarlaryn taratu qyzmetkerlerınıŋ «BAQ KASIPODAQ» salalyq käsıpodaǧy» qūrylǧanyn habarlaǧan edık. «Adyrna» ūlttyq portalynyŋ kezektı sūhbaty ūiym töraǧasy, belgılı jurnalist Zeiın Älıpbekpen boldy.
– Zeiın myrza, bügını käsıpodaq özınıŋ aitarlyqtai yqpalyn joǧaltyp alǧan joq pa?
– Äŋgıme elımızdegı jalpy käsıpodaq turaly bolsa, olardy pärmendılıgın joǧaltyp aldy degennen görı öz qūzyretın tiımdı paidalana almai otyr degen dūrys pa dep oilaimyn. Bügıngı käsıpodaqtardyŋ denı şipajailarǧa baǧasyn arzandatyp joldama beru, jaŋa jyldyq tättıler taratu, merekelık jiyndar ötkızu sekıldı dünielermen şektelıp otyrǧandai körınedı keide maǧan. Al, anyǧynda käsıpodaqtyŋ qūzyretı öte ülken. Mäselen, käsıpodaqtar barlyq deŋgeidegı memlekettık bilık organdarymen, jūmys beruşılermen jäne olardyŋ bırlestıkterımen, saiasi partiialar men özge de qoǧamdyq ūiymdarmen teŋ qūqyly özara qarym-qatynas jasai alady. Tiıstı memlekettık organdarǧa eŋbekaqy töleu, jūmyspen qamtu, eŋbektı qorǧau, ekologiialyq qauıpsızdık jäne äleumettık-eŋbek qatynastaryna qatysty mäseleler boiynşa zaŋ jobalary men özge de normativtı qūqyqtyq aktılerdı äzırleu jäne qarau turaly ūsynystar engızu qūzyretı bar. Nege osy mümkındıkterdı paidalanbasqa? Būqaralyq aqparat qūraldary men teleradio habarlaryn taratu qyzmetkerlerınıŋ «BAQ KASIPODAQ» salalyq käsıpodaǧy özınıŋ zaŋ aiasyndaǧy osy mümkındıkterın tolyǧymen paidalanudy közdep otyr. Būl – mäselelerdı jüielı türde şeşuge jol aşady.
– «BAQ KASIPODAQ» salalyq käsıpodaǧyn qūruǧa ne türtkı boldy? Qalai qūryldy?
– Şerhan Mūrtaza aǧamyzdyŋ «Jurnalistıŋ arqalaǧany – altyn, jegenı – jantaq» degen äigılı äuezesı älı künge deiın özektı. Özderınen kömek sūrap kelgen adamdardyŋ mäselelerın şeşıp berıp jüretın tılşı qauymnyŋ özderınıŋ äleumettık tüiınderı tarqatylmaǧan. Ärıptesterımız tūrǧyn üimen qamtu memlekettık baǧdarlamalarymen üi alu mümkındıgınen jyldar boiy qaǧylyp keledı. Memlekettık ideologiiany jüzege asyryp kele jatqan jurnalisterdıŋ elımızge sıŋgen eŋbegı eren emes dep kım aita alady? Jurnalisterdıŋ märtebesı aiqyndalmaǧandyqtan osyndai olqylyqqa jol berıldı. Būl - būqaralyq aqparat qūraldary qyzmetkerlerıne jasalǧan ädıletsızdık sekıldı sezıledı. Sondyqtan, baspana – jurnalisterdıŋ bügıngı basty mäselesı. Qazır ärıptesterımız mädeniet, sport jäne bailanys salasyna qatysty türlı käsıpodaqtar qūramynda, ärqaisysy är jaqta jür. Būl - kezındegı ministrlık qūrylymynyŋ är jyldary özgerıp otyruyna bailanysty bolsa kerek. Älbette, är sala öz qyzmetkerlerın ǧana oilaityny mälım. Mıne, osydan kelıp jurnalisterdıŋ baspanadan basqa da köptegen äleumettık mäselelerı şeşılmegen küiı kele jatyr. Bükıl tılşı aǧaiynnyŋ barlyǧynyŋ basyn qosyp, qiyndyqtarmen bırge küresuge mümkındık beretın jeke salalyq käsıpodaqtyŋ qajettıgı baiqaldy. Käsıpodaqty qūruǧa türtkı bolǧan närse – osy. Mūndai oi būrynnan jüretın. Osyndai käsıpodaq qūrylyp, oǧan jetekşılık jasau ūsynylǧanda bas tartpadym. Sebebı, būl – men üşın jurnalisterdıŋ basyndaǧy tüitkılderdı tarqatu jolynda äreket etuıme berılıp otyrǧan mümkındık.
– Būl käsıpodaq aldyna qandai maqsattar men mındetter qoiyp otyr?
– Bır sözben aitar bolsaq, jurnalisterdıŋ äleumettık-qūqyqtyq mäselelerın şeşuge atsalysudy mūrat etıp otyrmyz. Ärıptesterımız üşın sapaly medisinanyŋ qoljetımdı bolǧanyn qalaimyz, sport nysandaryna baru mümkındıgınıŋ artuyn dūrys köremız, dūrys demalyp, sanatoriilerde jūrt qatarly em alǧanyn jön sanaimyz, teatr men muzei sekıldı mädeniet oşaqtaryna baruyna joldyŋ keŋınen aşylǧanyn qūp sanaimyz. Jūmys oryndary järmeŋkesın ūiymdastyrudy, otandyq jäne şeteldık sarapşylardy tarta otyryp jurnalisterge oqytu kurstaryn ötkızudı, «Jas jurnalister mektebı» jobasyn jüzege asyrudy josparlap otyrmyz.
– Osy uaqytqa deiın jurnalister köbıne qandai aryz-şaǧymdarmen kömekke jügındı?
– Käsıpodaqtyŋ qūrylǧanyna köp bolǧan joq. Sondyqtan bolar, äl-äzır naqty jūmys beruşılerge bailanysty kömekke jügıne qoimady. Qol ūşyn berudı sūrap jatsa kömek qolyn sozuǧa daiynbyz. Tiıstı mamandarymyz bar. Zaŋgerlerımız keŋes beruge äzır.
– Jūmysşy müddesın qorǧauda alda taǧy qandai şaralar atqarylmaq?
– Jurnalisterge arnap eŋbek qauıpsızdıgı men eŋbektı qorǧau boiynşa qysqa merzımdı kurstar ötkızudı josparlap otyrmyz. Onda tötenşe jaǧdai, tehnogendık apat, äskeri äreketter kezınde jūmys ısteu taqyryptary qamtylatyn bolady. Sonymen qatar, zaŋ şyǧaruşy jäne atqaruşy organdarǧa BAQ jäne teleradiohabarlaryn taratu qyzmetkerlerınıŋ jūmysynyŋ qauıpsız boluyna kedergı keltıretın zaŋdyq kedergılerdı joiuǧa qatysty ūsynystar äzırlemek oiymyz bar.
– Käsıpodaqqa qalai kıruge bolady?
– Qazır käsıpodaqqa onlain kıruge bolady. Käsıpodaqtyŋ www.baqko.kz resmi saity arqyly ötınış jazsa jetkılıktı. Al, negızı keŋsemız Nūr-Sūltan qalasyndaǧy Qazmedia ortalyǧynda. Mekenjaiy – Qonaev köşesı, 4-üi. Basqa käsıpodaqqa müşe bola almaidy. Jarna mölşerı zaŋǧa säikes - eŋbekaqynyŋ 1 prosentı. Frilanserler 0,5 ailyq eseptık körsetkış kölemınde jarna töleidı. Zeinet jasyndaǧy adamdar men studentter jarna tölemeidı. Bükıl ärıptesterımdı būqaralyq aqparat qūraldary qyzmetkerlerınıŋ töl käsıpodaǧyna müşe boluǧa şaqyramyn. «BAQ KASIPODAQ» salalyq käsıpodaǧyna bırıgeiık. Öz mäselelerımızdı özımız şeşpesek bolmaidy. Oǧan mümkındık jetkılıktı.
«Adyrna» ūlttyq portaly
