Bügın Alatau audanynyŋ äkımdıgı qaza tapqan jeltoqsandyqtardyŋ ruhyna arnap as berıp, qūran oqytty. Şaraǧa jeltoqsandyqtarmen qatar, batyr ana, jeltoqsan qūrbany Läzzat Asanovanyŋ anasy Altynai Asanova qatysty. Şara barysynda jeltoqsandyqtar memleket tarapynan 150 000 teŋgelık kömektıŋ berılgenın jarysa aitysyp jatty. Alaida är jyl saiyn 16 jeltoqsanda berıletın qarjy osy joly da Altynai apamyzǧa būiyrmapty. «Altynai apamyzǧa qarjy nege berılmeidı?» degen sūraqqa «Aqiqat» jeltoqsanşylar ūiymynyŋ Alatau audanyndaǧy töraǧasy Eraly MÄMBETBAEV tömendegıdei jauap berdı.
–Qazır Almaty boiynşa jeltoqsandyqtardyŋ 12 ūiymy bar. Ökınışke qarai, ūiym-ūiymǧa bölınıp, bastarymyz älı de bırıkpeude. Syi-aqyny aqtalǧandar ǧana aldy. Almaty qalasy boiynşa şamamen 300-dei jeltoqsandyq 150 000 teŋge qarjyǧa ie boldy. Altynai apamyzǧa ǧana berılmei jatqan qarjy keleşekte şeşıledı dep oilaimyn. Öz basym osy mäselenı endı kötersem dep jürmın.Ärine, 150 000 myŋnyŋ soiylyn soǧu bylai tūrsyn, Alatau audany äkımdıgı ūiymdastyrǧan şarada da Altynai apamyzdy bır paraq maqtau qaǧazymen şyǧaryp salǧany köŋılge kırbıŋ ūialatady eken. Eh, būndaida «özgenı jarylqauda şeber, öz jaqsysyn ükılei bılmeitın qazaǧym-ai» deuden basqa amal joq sekıldı...
Aqgül AIDARBEKQYZY,
«Adyrna» ūlttyq portaly
