B.Baibek: "Qazaqqa eşkım jer syilaǧan joq"

«Nur Otan» partiiasy Töraǧasynyŋ Bırınşı orynbasary Bauyrjan Baibek jurnalist Nartai Aralbaiūlynyŋ YouTube-arnasyna bergen sūhbatynda Resei deputattarynyŋ kötergen jer mäselesıne qatysty pıkırın bıldırdı. Jurnalist atalǧan dauly mäselege qatysty partiianyŋ ūstanymyn sūrady. Jaqynda Resei Dumasynyŋ deputattary «Resei Qazaqstanǧa jer syilaǧan» dep aidy aspanǧa bır-aq şyǧardy. Osy oraida Bauyrjan Baibek «Nur Otan» partiiasynyŋ ökılderı alǧaşqylardyŋ bırı bolyp, ūlttyq müddenı qorǧap, reseilık qos deputatqa jauap bergenın mälımdedı. «Ol deputattar būl sözdı aitqan kezde eŋ bırınşı baǧa bergen Aidos Sarym boldy. Ol qazır bızdıŋ partiia atynan Mäjılıske ümıtker, saiasattanuşy. Köp ötpei Pavel Kazansev öz ūstanymyn bıldırdı. Ol partiiamyzdyŋ Saiasi keŋesınıŋ müşesı, Partiialyq baqylau komitetınıŋ töraǧasy 2013 jyly «Nur Otan» partiiasy özınıŋ saiasi tūǧyrnamasyn qabyldady. Sol kezde partiianyŋ ışınde keŋ auqymdy kezdesuler, pıkır talastar jürgen. Partiia ziialy qauym ökılderımen, ÜEŪ müşelerımen sol qūjatty talqylaǧan. Atalǧan negızgı qūjatta elımızdıŋ eŋ ülken jetıstıgı de, qūndylyǧy da memlekettıŋ täuelsızdıgı dep anyq jazyldy. Būl būryn da, keiın de aitylǧan türlı qisyq pıkırlerge «Nur Otan»-nyŋ bergen naqty jauaby bolatyn. Būl jauap özgergen emes. Partiianyŋ ūstanymy - halyqtyŋ bırlıgı, yntymaǧy, tūtastyǧy asa maŋyzdy», - dedı ol. Bauyrjan Baibek reseilık deputtardyŋ mälımdemesı arzan atqa ie boludyŋ amaly, qara bastyŋ qamy deidı. «Qazaqta «atyŋ şyqpasa, jer örte» degen söz bar ǧoi. Qazır haiptyŋ uaqyty. Men būryn būl deputattardyŋ atyn estıgen emespın. Olar osy sözderımen tanymal boluǧa tyrysady», - dedı ol. Sondai-aq ol sözınde Qazaqstan şekarasy halyqaralyq qūjattarmen moiyndalǧanyn, älemnıŋ ırı derjavalary elımızdıŋ jer tūtastyǧyna kepıldık bergenın qaita eske saldy. «Elbasy barlyq şekarany şegendedı. Qazaqstan iadrolyq arsenaldan bas tartqan kezde AQŞ, Qytai, Resei sekıldı memleketter qūjatqa qol qoiu arqyly resmi türde elımızdıŋ territoriialyq tūtastyǧyna kepıldık bergen. Sondyqtan şekaramyz bekıtılgen», - dedı sūhbatynda partiia Töraǧasynyŋ Bırınşı orynbasary. Ūlt üşın mūndai maŋyzdy mäselede bilıktegı partiianyŋ basşylyǧy ünsız qalmai, B.Baibek te atalǧan jer dauyna qatysty öz ūstanymyn anyq jetkızdı jäne ūlt tarihynda tegın jerdıŋ bolmaǧanyn qadap aitty. «Qazaqtyŋ tarihynda bızge eşkım eşqandai jer syilaǧan joq. Barlyq jerımız babalarymyzdyŋ maŋdai terımen, tögılgen qanymen bügınge deiın aman jettı. Endı bızdıŋ, partiianyŋ, bügıngı buyn jastardyŋ da mındetı - täuelsızdıgımızdı nyǧaitu», - dedı Bauyrjan Baibek. İä, diplomattarymyz, deputattarymyz qajettı jauabyn berdı. Bastysy – bız qazaqtyŋ tereŋ tarihynda eşbır körşımız «mıne, ala qoi» dep bır qarys jerın de syiǧa bermegenın bılemız. Ūlan ǧaiyr atyrapty qorǧauda qazaqtyŋ ǧana qany tögılgen. Degenmen būl künde tek täuelsızbız dep kökırek ūru jetkılıksız. Saiasi, ekonomikalyq, qarjylyq, demografiialyq, azyq-tülık, diplomatiialyq, äskeri täuelsızdıktı saqtau da asa maŋyzdy ekenın älemde bolyp jatqan soŋǧy geosaiasi prosester däleldep keledı. Öitkenı osy salalardyŋ bırınde özgege kırıptar bolsaq, erkındıgımızdıŋ jartysyn sol tarapqa jyryp berdık degen söz. Bauyrjan Baibek sūhbat barysynda Tauly Qarabahtaǧy qaqtyǧystyŋ qandai jaǧdailarǧa alyp kelgenın aityp, jer dauynyŋ saldary auyr bolatynyn eskerttı. «Osyndaida Elbasynyŋ «Täuelsızdıktı alu qiyn. Al ony ūstap qalu odan da qiyn» degen sözı eske tüsedı. Qazırgı taŋda qaǧaz jüzınde özın egemenbız degen el köp. Bıraq de-fakto özge memleketter bilep jatyr. BŪŪ mälımetı boiynşa, 60 juyq memleket älı de şekara mäselesın tolyqtai şeşpegen», - dep oiyn qorytyndylady. Sūhbatynyŋ soŋynda partiia Töraǧasynyŋ Bırınşı orynbasary tarihty bılmeitın adamdardyŋ terıs oiyna bola körşılermen qarym-qatynasymyz būzylmauy tiıs ekenın basa aitty. Bauyrjan Baibektıŋ YouTube – arnaǧa bergen sūhbaty jaqyn künderı jariialanady.

Abai.kz