Qaraǧandy qalasynyŋ tūrǧyny bır kün ışınde tört avtokölıktı zaŋsyz aidap äketken, – dep habarlaidy «Adyrna» IIM-ge sılteme jasap.
17 jeltoqsan künı Qaraǧandy qalalyq Polisiia basqarmasyna qarasty Kirov polisiia bölımıne qalanyŋ üş bırdei tūrǧyny habarlasqan. Olar belgısız bıreudıŋ özderıne tiesılı avtokölıkterın aidap äketkenı turaly aryzdanǧan.
Mäselen, belgısız bıreu 63 jastaǧy azamattyŋ qūny 400 myŋ teŋge tūratyn “VAZ-2106” avtokölıgın aidap äketse, taǧy bıreu 35 jastaǧy jäbırlenuşınıŋ qūny 700 myŋ teŋge tūratyn “Mersedes” avtokölıgın qoldy qylǧan. Arada bır saǧattai uaqyt ötkennen keiın üilerdıŋ bırınıŋ aulasynan belgısız azamat 32 jastaǧy qala tūrǧynynyŋ qūny 3.5 mln teŋge tūratyn “Passat” avtokölıgın ūrlap äketken. Keiın qaskünem üş kölıktı de Qaraǧandy qalasynyŋ basqa audandarynda tastap ketken.
Polisiia qyzmetkerlerı būl qylmystardyŋ barlyǧyn bır adam ısteuı mümkın degen boljam jasady. Üş kölıktı ūrlaǧan azamat Qaraǧandy qalalyq Polisiia basqarmasyna qarasty Oŋtüstık-şyǧys polisiia bölımı qyzmet körsetetın aumaqtan törtınşı kölıkke auyz saldy. Ol būl joly qaladaǧy bazarlardyŋ bırınıŋ maŋynan qūny 1,5 mln teŋge tūratyn “Lexus” avtokölıgın aidap äketken. 32 jastaǧy jäbırlenuşı kölıgın belgısız bıreudıŋ zaŋsyz aidap äketkenı turaly bırden polisiia qyzmetkerlerıne habarlaǧan.
Kölıktı tabu, küdıktını ūstau boiynşa “Tosqauyl” operasiiasy bastaldy. Qaraǧandy qalalyq Polisiia basqarmasy patruldık polisiia qyzmetkerlerı qala ortalyǧyndaǧy köşelerdıŋ bırınen ūrlanǧan kölıktı baiqaǧan.
Atalǧan kölıktı 22 jastaǧy azamat basqaryp kele jatqan. Ūstalǧan küdıktı tört kölıktı de zaŋsyz aidap äketkenın moiyndady. Atalǧan faktıler boiynşa Qazaqstan Respublikasy Qylmystyq kodeksınıŋ 200-babyna (Avtomobildi nemese özge de kölik qūralyn jymqyru maqsatynsyz qūqyqqa syiymsyz ielenıp alu) säikes qylmystyq ıs qozǧalyp, tergeu amaldary jürgızılude. Küdıktı uaqytşa ūstau izoliatoryna qamaldy.
«Adyrna» ūlttyq portaly
