Bıyl – Aral aımaǵyna, Syr óńirine keń tanymal aqyn Serik Seıitmaǵambetovtiń dúnıeden ótkenine otyz jyl. Ol qazaqtyń qara óleńine adal boldy. Týǵan jerinen tamyryn úzbeı, ómir boıy Araldy meken etti. Teńiz tóńireginiń adamdaryn únemi jyr arqaýyna aınaldyrdy. Óleńderine ór minez darytty.
«Birde ásker qatarynda azamattyq boryshyn ótep júrgen Serik aqynnyń óleńderi «Lenınshil jas» gazetinde jaryq kórdi. Naızaǵaı otyndaı jarq ete qaldy. Bárimiz tańyrqaı qarastyq. «Aqyn degen osyndaı bolý kerek» dep uqtyq. Ásirese, Syr eliniń jyrsúıer qaýymyn eleń etkizgen edi… Ol týma talant edi. Keń qulashyn jaza almady…» dep jazdy qazaqtyń belgili aqyny Shómishbaı Sarıev.
Tabıǵaty taza shaıyrdyń shynaıy kelbetin keıipteýge tek arqaly aqyndar ǵana emes, salmaqty sýretshiler de atsalysýda. Bul portretti salǵan – V.I.Sýrıkov atyndaǵy Máskeý memlekettik akademııalyq kórkemsýret ýnıversıtetiniń túlegi, elordadaǵy Qazaq ulttyq óner ýnıversıtetiniń doenti Shynybaı Pirimbaev. Qasıetti Qaratereńniń qunarly topyraǵyn borpyldatyp basyp ósken búgingi beıneleý óneriniń sheberi sóz zergeriniń ishki álemine, jan dúnıesine úńilýge tyrysty.
«Arǵymaqqa báribir,
Aqpanyń men aptabyń.
Qasıetti jany – nur,
Qaıran jylqy – maqtanym», – dep jyrlaǵan Serik aqynnyń kóńil tolqynysy sýret ónerinde osylaısha kórinis tapty...
Baýyrjan OMARULY
