Qazaqstanda janýarlarǵa qatygezdik kórsetkender 2 jylǵa sottalady

4607
Adyrna.kz Telegram

Qazaqstanda janýarlarǵa qatygezdik kórsetken adamdardyń 2 jylǵa deıin bas bostandyǵy shektelýi múmkin.  Bul týraly  «Adyrna» ulttyq portaly Ekologııa, geologııa jáne tabıǵı resýrstar mınıstrliginiń resmı saıtyna silteme jasaı otyryp habarlaıdy.

 

«Adamdar tarapynan janýarlarǵa ne úshin qatygezdik jasalatyny túsiniksiz. Bul aqtaýǵa kelmeıdi. Kún saıyn áleýmettik jelilerde aqylǵa syımaıtyn áreketter jarııalanyp jatady. Aqqýdy tunshyqtyryp, ıtbalyqty uryp, ıtti qorlap jatqanyn kórdik. Buǵan uqsas faktiler kóp. Sondyqtan jazany kúsheıtý qajet», - dedi Maǵzum Myrzaǵalıev.

Sondyqtan mınıstrlik búginde Qylmystyq kodekstiń 316 «Janýarlarǵa qatygezdik jasaý» baby boıynsha jazany kúsheıtýdi usyndy.

«Aıyppul ulǵaıady jáne bas bostandyǵyn shekteý jazasy engizilýi múmkin. Zań jobasy jaqynda Májiliske joldandy. Budan bólek depýtattarmen, janýarlardy qorǵaýshylarmen birge Janýarlardy qorǵaý týraly Zań jobasy ázirlendi. Onyń júzege asýy janýarlarǵa adamgershilikpen, jaýapkershilikpen qaraýdy qamtamasyz etedi. Túrli sanattaǵy janýarlarǵa qaraý boıynsha jalpy jáne arnaıy talaptar bekitiledi. Sonymen birge janýarlarǵa jasalǵan kez kelgen qatygezdik áreketke qatysty jaýapkershilik ilespe zańda qarastyrylǵan», - dedi mınıstr.

Atap óteıik, jańa qujatta jabaıy, úı, qyzmettik jáne aýyl sharýashylyǵy janýarlaryna jasalatyn qatygezdiktiń aldyn alý sharalary tolyq qaralǵan. Janýarlarǵa veterınarlyq kómek, tıisti kútim jasaý, oıyn-saýyqtyq maqsatta paıdalaný erejeleri bekitilgen.  Al janýarlarǵa qatygezdikti nasıhattaýǵa tyıym salynǵan.

"Adyrna" ulttyq portaly

Foto ashyq derekkózden alyndy

Pikirler