«ArselorMittal Temırtau» AQ şahtasyndaǧy apat oryn aldy. Būl turaly «Adyrna» tılşısıne Qazaqstan Respublikasy Tötenşe jaǧdai ministrınıŋ baspasöz qyzmetı habarlady.
2021 jylǧy 13 qaŋtarda saǧat 21.53-te «ArselorMittal Temırtau» AQ Kömır departamentınıŋ «Lenin atyndaǧy» şahtasynda (gorizonty 340, tereŋdıgı 840 metr) barlau ūŋǧymasyn būrǧylau kezınde metan gazy men kömırdıŋ ūsaq fraksiialary bölındı. Būl künı üş jūmysşy, atap aitqanda būrǧylau qondyrǧysynyŋ maşinisı, maşinistıŋ kömekşısı, sondai-aq jeldetu jäne qauıpsızdık tehnikasy uchaskesınıŋ tau-ken şeberı ūŋǧyma tübınde barlau jūmystaryn jürgızıp jatqan. Apat saldarynan tau-ken şeberı men maşinistıŋ kömekşısı apat ornynan dereu ketıp qaldy, al maşinist ūŋǧyma tübınen şyǧa almady.Apat kezınde şahtada üşınşı auysymnyŋ 137 qyzmetkerı bolǧan. Olardyŋ 136-sy jer betıne şyǧaryldy. Käsıporynnyŋ avariialyq-qūtqaru qyzmetı kelgennen keiın dereu şahtaǧa tüstı. Saǧat 23.00-de aerogazdy baqylau apparaturasynyŋ körsetkışterıne säikes şahtanyŋ tau-ken qazbalaryndaǧy gaz jaǧdaiy qalypqa keldı. Avariialyq-qūtqaru qyzmetınıŋ bölımşesı ūŋǧyma tübındegı tau-ken massasyn tazalauda. Zardap şekken bır adamdy ızdestıru jūmystary jalǧastyryluda. Izdestıru jūmystaryna şahtanyŋ 17 qyzmetkerı men avariialyq-qūtqaru qyzmetınıŋ ekı bölımşesı (16 adam) jūmyldyryldy. Atalǧan apatty tekseru üşın QR TJM Önerkäsıptık qauıpsızdık komitetınıŋ Qaraǧandy oblysy boiynşa departamentınıŋ janynda komissiia qūryldy.
"Adyrna" ūlttyq portaly
Foto aşyq derekközden alyndy
