Qazaqstan Jazuşylar odaǧy Nūr-Sūltan qalalyq filialy jaŋa jyldy mazmūndy ıs-şaralarmen bastady. Osydan bır ai būryn Qazaqstan Jazuşylar odaǧy Nūr-Sūltan qalalyq filialy men Nūr-Sūltan qalasy äkımdıgınıŋ ūiymdastyruymen aqyndar arasynda «Köŋılde alaŋ basylsa...» atty müşäira jariialanǧan bolatyn.
Elorda äkımdıgınıŋ qarjylandyruymen ötken jyr dodasynyŋ jeŋımpazdary anyqtalyp, marapattau räsımı öttı. Jas qalamgerlerdıŋ şyǧarmalaryn baǧalap, saraptaǧan qazylar alqasynyŋ qūramynda aqyndar Oŋaigül Tūrjan, Janat Äskerbekqyzy, filial direktory Däuletkerei Käpūly boldy.
Eluge tarta aqyn synǧa tüsken jyr saiysynda bas jüldenı Bırjan Ahmer enşıledı. Bırınşı orynǧa aqyn Aizada Rahymjanova ie bolsa, ekınşı oryn Erlan Amanqojaǧa būiyrdy. Al üşınşı därejelı diplomǧa Aidana Segızbaeva, Äli Bekmūhanbet, yntalandyru syilyǧyna Alpamys Faizolla, Auǧanbai Sanaqūly, Erasyl Säduaqas laiyq dep tabyldy. Jüldelı öleŋderdı elordalyq teatr akterlerı oqitynyn da aita ketuge tiıspız.
Jeŋımpaz qalamgerlerge sättılık tılegen aqyn Oŋaigül Tūrjan jelkıldegen jas kezınde Jūban Moldaǧalievtei klassikter aq batasyn berıp, tılekşı bolǧanyn, bügın özderınıŋ de öskeleŋ ūrpaqqa jol sılteitın uaqytqa kelgenın jetkızdı. Öz sözınde syrşyl aqyn jastardyŋ köpşılıgınıŋ tanymy tömen, bılımı taiaz ekenın jasyryp qalmady. Odan şyǧar jol tynymsyz ızdenıs, qajymas qairat degen oilary jinalǧandardyŋ kökeiıne qonǧandai.
Şara aiasynda elordalyq bölımşe direktory Däuletkerei Käpūlynyŋ jastar şyǧarmaşylyǧy jönındegı orynbasary bolyp aqyn, jurnalist Oljas Qasym taǧaiyndaldy. Jauapkerşılık jügın arqalaǧan qalamger senım üdesınen şyǧatynyn aityp, jastarmen bırlese jūmys ısteitının mälımdedı. Sondai – aq basqosu barysynda qaladaǧy aqyn-jazuşylarǧa Äzırbaijan Elşısı R.Mammadovtyŋ alǧys haty, respublikalyq «Samuryq» ädebi-mädeni jurnaly tabystaldy.
