Elımızde aqparat qauıpsızdıgı saqtalmai otyr. Oǧan kündelıktı közımız körıp, qūlaǧymyz estıp jürgen «telejäşıktegı» körınıster kuä.
Basty «Otau tv» otandyq sandyq aqparat taratuşy jäne basqa da kabeldı operatorlary köbınese Resei arnalaryn körermen nazaryna ūsynudan jalyqpai keledı. Būl qalypty tendensiiaǧa ainaldy. Körşı memlekettıŋ jaŋalyqtaryn köpşılık qauymǧa jetkıze otyra, özge eldıŋ sanany ulaityn terıs saiasatyn bızge nasihattauda. Äsırese «Resei 24» ai-künnıŋ amanynda tıkelei efirde äsıreūltşyl Vladimir Jirinovskiidıŋ Qazaqstannyŋ keibır oblysyn Reseige qosyp alu tūrǧysyndaǧy, memleketımızdıŋ tūtastyǧyna nūqsan keltıretın dakpyrt mälımdemelerın taratyp, el ışınde ūltaralyq narazylyqty tuǧyzuǧa äser etude. Oǧan Vladimir Solovevtıŋ qazaqstan turaly şovinistık piǧyldaǧy sözderın qosyp qoiynyz. Ärine, sony körıp estıgen özge ūlt azamattarynyŋ elımızge degen «özgeşe oiynyŋ» paida bolatyny şyndyq.
Atalǧan jaittardan Qaraǧandy qalasy da qalys qalmai keledı. Mäselen, osyndaǧy jekemenşık «5 arna» 15 jyldan astam uaqyt aimaǧymyzǧa «Resei 1» telearnasyna retransliasiia jasap keledı. Kün ūzaq orysşa konsert, tok şoular, oiyn sauyq baǧdarlamalaryn üzbei körsetude. Eŋ ökınıştısı sol, arnanyŋ är jūmys künı keşke praim-taim uaqytynda reseilık «Vesti» jaŋalyqtaryn berıp otyratyny köŋılge kırbıŋ ūialatady. Ol az bolǧandai, är aptanyŋ soŋynda «Vesti nedeli» aptalyq qorytyndy saraptamalyq baǧdarlamasy körermen qauymǧa jol tartuda. Osydan 1-2 jyl būryn Donbass separatisterınıŋ Ukrainaǧa qarsy soǧysqa şaqyrǧan habary şyǧyp, besınşı arna basy ülken dauǧa qalyp, jergılıktı körermen narazylyǧyn tuǧyzǧan edı.
Sonda ne, körşı eldıŋ habaryn taŋ atqannan qas qaraiǧanşa köretındei, Qaraǧandy Reseidıŋ provinsiiasy ma?
Atalǧan jaittardy köre-bıle tūra, öŋırımızdıŋ aqparat salasyna jauapty basşylary, Qaraǧandy oblysy äkımınıŋ ideologiiaǧa jauapty orynbasary Abzal Nüken, oblystyq ışkı saiasat basqarmasynyŋ basşysy Erlan Qūsaiyn myrzalar qaida qarap otyr? Būl olardyŋ jūmysyna ülken syn. Atam qazaq aitady «syn tüzelmei, mın tüzelmeidı» dep. Eŋ bastysy, ärqaisymyz öz elımızde ömır sürıp jürgenımızdı sezınsek boldy äleumet.
Qazaqstan Jurnalister odaǧynyŋ müşesı.
