Endı qazaqşa qate jazylsa, zaŋmen qudalanady

Qazaq tılınde qate jazylǧan jarnamalar zaŋmen qudalanady. Būl turaly Mäjılıs deputaty Berık Äbdıǧali özınıŋ paraqşasynda jazdy dep habarlaidy «Adyrna» ūlttyq portaly. «Bügın Mäjılıste bırınşı oqylymda körnekı aqparat mäselelerı boiynşa özgerıster men tolyqtyrular engızu turaly zaŋ jobasy qabyldandy. Zaŋ jobasyn daiyndau jūmys tobynyŋ jetekşısı retınde onyŋ jūmysy turaly qysqaşa habardar etuge rūqsat etıŋızder. Jūmys tobynyŋ 4 otyrysy öttı. Onda qazaq tılınde sauatty jazudy talap etıp, memlekettık tıldıŋ qoldanys aiasyn keŋeitetın 40-tan asa tüzetu ūsyndyq. Ökınışke qarai, älı de köşelerdegı qazaq tılınde qate jazylǧan aqparattan qūtyla almai kelemız. Sondyqtan zaŋ jobasynda qoǧamdaǧy köterılıp jürgen syrtqy jarnamalar men maŋdaişalardaǧy, basqa da körnekı aqparattardaǧy qazaq tılınıŋ sauatty jazyluy jäne mätınderdıŋ tüpnūsqaly audarmasy boiynşa qosymşa talaptardy belgıleu közdelgen. Būl käsıpkerlerdıŋ jäne ärbır azamattyŋ jauapkerşılıgın küşeituge mümkındık beredı dep sanaimyz. Jūmys jalǧasyp jatyr» dep jazdy B.Äbdıǧali.