Almatylyq Altynai Üsenova ekı aidan berı arzan qonaq üidı panalauǧa mäjbür. Şetelde oqyǧan qarjyger bır kezderı öte tabysty adam bolǧan. Şirek ǧasyrǧa juyq uaqyt halyqaralyq kompaniialarda qyzmet etken. Üsenova mūndai müsäpır küige tüsuıne jaqyn tanysyn kınälap otyr. 8 jyldan berı jaqyn aralasqan adamy bır-aq sätte özın taqyrǧa otyrǧyzyp ketken, dep habarlaidy Adyrna ūlttyq portaly «Zaŋ söilesın» baǧdarlamasyna sılteme jasap.
«Ekı päterımnen, ülken üiımnen aiyrylyp, dalada qaldym. Sydyqov Oljas Serıkūly degen adam menı aldap, senımıme kırıp, 257 million teŋge aqşamdy alyp kettı. 25 jyl ıstegen eŋbegım qūmǧa sıŋgendei joq boldy. Endı üisız, küisız mynadai jerde tūruǧa mäjbürmın», - deidı Almaty qalasynyŋ tūrǧyny Altynai Üsenova.Oljas Altynaidy agrobizneske investisiia saluǧa köndırgen. Qyrǧyzstannan tonnalap kartop äkelıp, ony eldegı ırı sauda oryndaryna ötkızetını turaly kelısım şarttardy körsetedı. Şaş etekten paidaǧa kenelesıŋ, salǧan aqşaŋ eselep qaitady dep sendırgen.
«5-10 myŋ dollar, odan keiın 56 myŋ dollar, soŋynda 200 myŋ dollardy qolyna sanap berdım. Ol maǧan 1 million dollardyŋ kelısım şarttaryn körsettı. Är kelısım şarttan 40% ülesıŋdı alyp otyrasyŋ dedı. Alaida 40% tügılı salǧan investisiiamdy, aqşamdy ala almai qaldym. Söitsem aitqanynyŋ bärı ötırık eken. Kelısım şartta körsetılgen kompaniialar tügel jalǧan bolyp şyqty», - deidı ol.Altynaidyŋ tanysyna közsız senuınıŋ, eş qoryqpastan bizneske aqşa saluynyŋ taǧy bır sebebı bar. Kelınşek Oljastyŋ äkesı joǧary qyzmettegı lauazym iesı bolǧanyna qarap, ondai azamattyŋ ūly aldap ketpes dep sengen.
«Oljas - bar jerden şyqqan jıgıt. Äkesı ülken qyzmette otyr. Ol özın ünemı tabysty adam retınde, myqty biznesmen keipınde körsetetın. Aqşa bererde osy jaǧdaiattar maǧan qatty äser ettı. El üşın qyzmet etıp jürgen tūlǧanyŋ balasy aldaidy dep eş oilamadym», - deidı Almaty qalasynyŋ tūrǧyny Altynai Üsenova.Qazır Altynaidyŋ qolynda aqşanyŋ ornyna Oljasqa jıbergen aqşalarynyŋ tübırtegı ǧana bar. 257 million teŋgenı qaltaǧa basqan tanysy qaryzdy äne berem, mıne beremmen uaqytty sozǧan. Myna audiohabarlamasynda da jas jıgıt aqşany qaitaryp beretının aityp sendıredı.
«Men tırlıktı aiaqsyz qaldyrǧym kelmeidı. Saǧan uäde etkendei, bärın dollarmen, dollar baǧamy qandai bolsa da dollarmen qaitaramyn. Raqmetımdı de aitamyn. Altynai, saraŋ adam emesımdı bılesıŋ ǧoi? Men bärın qaitaramyn, sen ony jaqsy bılesıŋ», - dep audiohabarlama jıbergen Oljas Sydyqov.Bıraq uäde etılgen paida da, aqşanyŋ özı de bolmaǧan soŋ Altynai Üsenova polisiiaǧa aryzdanǧan. Qylmystyq ıs qozǧaǧan Almaty qalasynyŋ Almaly audandyq polisiia basqarmasynyŋ tergeuşılerı Oljastyŋ atyna tırkelgen kompaniialardyŋ jalǧan ekenın anyqtaǧan körınedı.
«Tergeu kezınde onyŋ atyna tırkelgen 5 kompaniianyŋ bır-bırımen jalǧan kelısım şart jasap otyrǧany anyqtaldy. Şet eldermen bailanys tügılı bır tiynǧa sauda jasamaǧan. Bıraq qūjattardy öte sauatty räsımdegen. Qoiylǧan mörler men kelısım şarttar bır adamnyŋ qolynan şyqqan», - deidı Altynai.Oljas Sydyqovtyŋ üstınen asa ırı kölemdı aqşa jymqyrdy, alaiaqtyq jasady degen aiyppen qylmystyq ıs qozǧalǧan. Küdıktı ekı aidan berı tergeu abaqtysynda otyr. Altynaidyŋ advokaty onyŋ aqşany su jaŋa kölıkke, basqa qymbat mülık aluǧa jūmsaǧany däleldense de, tergeu sybdyr jürıp jatyr dep esepteidı.
«Tergeuşılerdıŋ basty maqsaty - qylmyskerdı ūstap, türmege otyrǧyzu ǧana emes, jäbırlenuşıge keltırgen ziianyn öndırıp beru. Künı bügınge deiın Oljastyŋ bank esepşoty men atyndaǧy bar mülkıne eşqandai būǧat qoiylmaǧan. Onyŋ aqşany alaiaqtyq jolmen alǧanyna barlyq däleldı bersek te, tergeu dūrys jürıp jatqan joq. Is būrmalanyp jatyr dep sanaimyz», - deidı advokat Renat Nainbaev.Altynai Üsenova tergeudıŋ tūralauyna Oljastyŋ äkesınıŋ mansaby sebepker me dep küdıktenedı. Äitpese, qoldaryndaǧy bar aiǧaqpen tergeu ısın ekı aidyŋ ışınde aiaqtauǧa bolar edı deidı. Al abaqtyda otyrǧan küdıktınıŋ äkesı, rasymen de, astanada jauapty qyzmettegı lauazym iesı bolyp şyqty. Oljastyŋ äkesı Serık Sydyqov myrza ūzaq jyl senat apparatynda basşylyq qyzmette ıstegen. Qazır ortalyq sailau komissiiasynyŋ müşesı. Jäbırlenuşınıŋ küdıgıne bailanysty Serık myrzamen söilestık. Ol balasynyŋ basyndaǧy jaǧdaiǧa aralaspaitynyn, bärın qūzyrly oryndar şeşetının aitty.
«Ony men qaidan bıleiın? Men balamnyŋ tergeude jatqanyn ǧana bılemın. Bıraq onyŋ detaldaryn bılmeimın. Qylmystyq ıs tergeude jatyr. Ol kämelet jasyna tolǧan azamat bolǧandyqtan, öz ısıne özı jauap beredı. Onyŋ detaldaryn bılmeimın. Ol kısı aryz berıptı. Menıŋ jūmys ornyma jazǧan, basqa jerlerge de jazǧan. Ol turaly ne aita alamyn? Eşteŋe dei almaimyn», - deidı Oljastyŋ äkesı Serık Sydyqov.Almaty qalasynyŋ polisiia departamentıne habarlastyq. Tergeudıŋ män-jaiyn sūradyq. Departament ökılı qylmystyq ıstıŋ äzırge tergelıp jatqanyn, nauryz aiynda ıstı sotqa joldaityndaryn aityp, jazbaşa jauap berdı. Aldanyp bar aqşamnan aiyryldym degen Altynai Üsenova älı de bıraz uaqyt qonaq üide tūratyn sekıldı.
