Densaýlyq saqtaý mınıstrligi vedomstvo basshysy ózine 15 mıllıon teńge kóleminde syıaqy jazdyrǵan degen aqparatqa qatysty túsinikteme berdi. Mınıstrlik depýtat Azat Perýashevtyń málimdemesinen keıin ún qatty.
Vedomstvo «aıtylǵan faktiniń densaýlyq saqtaý mınıstrligine qatysy joq» dep málimdedi, dep habarlaıdy «Adyrna» ulttyq portaly Sputnik Qazaqstan saıtyna silteme jasap.
«Syıaqy tólemderi qatań túrde qoldanystaǵy zańnama talaptaryna sáıkes, atap aıtqanda, «Qazaqstan organdarynyń qyzmetkerlerine syılyq berý, materıaldyq kómek kórsetý jáne laýazymdyq jalaqylaryna ústemeaqylar belgileý týraly» úkimettiń 2001 jyldyń 29 tamyzyndaǵy №1127 qaýlysyna sáıkes júrgiziledi. Osyǵan baılanysty 15 mıllıon teńge mólsherinde tólengen syıaqyǵa qatysty aqparat shyndyqqa janaspaıtynyn habarlaımyz», - dep málimdedi vedomstvo.
Buǵan deıin depýtat Azat Perýashev densaýlyq saqtaý mınıstrligine syn aıtyp, keıbir sheneýniktiń ózine 15 mıllıon teńge kóleminde syıaqy jazyp alǵanyn málimdedi. Alaıda depýtat bul sózin qaı vedomstvoǵa qaratyp aıtqanyn naqtylamady. Al onyń aldynda qazaqstandyqtar bilim jáne ǵylym mınıstriniń mıllıondaǵan syıaqy alǵany týraly aqparatty talqylady.
Qoǵam belsendileri sheneýnikterdi qoldady
Belgili ekonomıst Oljas Qudaıbergenov Facebook paraqshasynda keı mınıstrlikte 36 aılyq esebinde syıaqy jazyp alatyndaryn aıtty.
«Qarapaıym azamattardyń jalaqysymen salystyrǵanda bul úlken soma shyǵar, biraq shyn máninde bul kóp aqsha emes. Mınıstrlerdiń jalaqysy 800-900 myń teńge shamasynda, al vıe-mınıstrlerdiń jalaqysy 500-600 myń teńge. Bul kvazımemlekettik jáne jeke sektormen salystyrǵanda tómen jalaqy», - dep pikir bildirdi prezıdenttiń eks-keńesshisi.
Oljas Qudaıberegenov qazir sapaly mamandar aıyna bes mıllıon teńgege deıin jalaqy alady degen pikir aıtty. Sondyqtan sheneýnikterde memlekettik qyzmettegi mańyzdy baǵyttarǵa qajetti mamandardy tartýda qıyndyqtar týyndaıdy.
"Adyrna" ulttyq portaly
