Sońǵy qońyraýda muǵalimderge syılyq alýǵa tyıym salynǵanyn bilim jáne ǵylym vıe-mınıstri Sholpan Karınova málimdedi, dep habarlaıdy «Adyrna» ulttyq portaly inbusiness.kz saıtyna silteme jasap.
«Bıylǵy shekteý sharalaryn eskerip, 25 mamyrda ótetin sońǵy qońyraýǵa birneshe format usynyldy. Birinshisi, dástúrli túrde taza aýada 9-11-synyp oqýshylary men 300-ge deıin oqýshysy bar ári osy ýaqytqa deıin shtattyq rejımde bilim bergen mektepterge arnalǵan sońǵy qońyraý. Budan bólek eki nusqa bar. Onyń biri sońǵy qońyraýdy synyp ishinde, ekinshisi onlaın ótkizý. Qajet dep sanalsa, synyp ishinde ótkizý nusqasy usynylady. Al qashyqtan oqytyp jatqandar úshin sońǵy qońyraý merekesi onlaın rejımde bolady», – dedi Sholpan Karınova.
Sonymen qatar vıe-mınıstr sońǵy qońyraýda muǵalimderge syılyq alýǵa tyıym salynǵany týraly da aıtty.
«Sońǵy qońyraý ótkizýdiń negizgi maqsaty – barlyq mektep oqýshylary úshin belgili bir synypty aıaqtap, kelesi synypqa ótý jáne jazǵy demalystyń bastalýy. 9-11 synyptar úshin sońǵy qońyraý mektep bitirý is-sharasy bolyp sanalady. Barlyq sanıtarlyq talaptyń qatań saqtalýyn mektep ákimshiligi nazarǵa alýǵa tıis. Ár oqýshymen, ár mektep bitirýshimen keletin ata-ananyń sany birden aspaýy kerek. Sońǵy qońyraýda muǵalimderge syılyq alýǵa tyıym salyndy», – dedi ol.
"Adyrna" ulttyq portaly
