Qazaq teatr óneriniń tarlandarynyń biri, akter, teatr rejısseri - Slambek Áınekbaıuly Jumaǵalıdyń týǵanyna 65 jyl toldy. Akter osydan bir jyl buryn indet saldarynan qaıtys bolǵan edi.
Teatr tarlanyn, jýrnalıst Amanǵalı Qaljanov óziniń Facebook paraqshasynda, Slambek Áınekbaıulymen ótkergen estelikteri men jasaǵan ıgi amaldaryn jazyp, úlken tebirenispen esine aldy.
"Keshe aktıor, teatr rejısseri Slambek Jumaǵalıdyń (1956-2020) týǵanyna 65 jyl toldy. Amal joq, endi solaı aıtamyz. Bir jyldaı buryn indet óreli ónerpazdy aramyzdan julyp alyp ketti...Slambek Áınekbaıulymen FB-da dos edik, ómirde jaqyn aralasyp úlgermedik. Áleýmettik jelide maǵan únemi tilektestigin bildirip turatyn. Jaqsy adam edi. Birneshe jyl buryn aıaýly jary, aktrısa Baıan Áýkeshova ómirden ozǵan edi. Slambek aǵa sonda qatty qaıǵyrdy. Arada az ýaqyt ótkende sońynan attandy...Slambek Áınekbaıulynyń eńbegi S. Seıfýllın atyndaǵy Qaraǵandy oblystyq akademııalyq qazaq drama teatryna sińýdeı-aq sińdi. Osynda akter bolyp, rejıssıor retinde spektaklder qoıdy.Alataý azamaty Arqaǵa sińip ketken edi. Bertinde ǵana onyń Alataý baýraıynda týǵanyn bildim. Bar bolmysymen Arqanyń azamatyndaı elesteıtin. Sóıtsem, Alataýdyń asqaqtyǵyn, Arqanyń keńdigin boıyna sińirgen eken.Kesheli beri FB-da Slambek aǵa týraly bireý birdeńe jaza ma dep oılaǵan edim, ondaı eshteńeni baıqamadym. Sondyqtan asyl azamatty osylaı eske alýdy jón kórdim.Jatqan jeri jaıly, topyraǵy torqa bolsyn! Rýhy peıishte shalqysyn! Jasamaǵan jasyn jaratqan urpaǵyna bersin!" dep jazdy ol óz jazbasynda.
Slambek Jumaǵalı - akter, pýblııst 1956 jyly dúnıege kelgen. Almaty Memlekettik teatr jáne óneri ınstıtýtyn (1981), QarMÝ-di bitirgen (1997). 1984 jyldan S. Seıfýllın atyndaǵy oblystyq qazaq drama teatrynyń artısi ári ádebıet bóliminiń meńgerýshisi qyzmetin atqarǵan.
Onyń oınaǵan K. Jumabekovtyń «Zamana netken tar ediń...» — Abaı, Á. Orazbekovtyń «Bir túp alma aǵash» — Erǵalı, M. Áýezovtin «Aıman-Sholpan» — Kótibar beıneleriniń shoqtyǵy bıik.
Teatr salasyndaǵy óshpes eren eńbegi úshin Abaı atyndaǵy respýblıkalyq festıvaldin Kúmis júldegeri (1995), Mádenıet mınıstrliginin «Mádenıet qaıratkeri» kurmet belgisimen marapattaldy (2002).
"Adyrna" ulttyq portaly
