Büiregımdı satamyn: Köp balaly ananyŋ basqa amaly qalmady

Qaryzdan qūtylu üşın büiregımdı satamyn. Qyzylorda qalasynyŋ tūrǧyny, köpbalaly ana amalsyzdan osyǧan baruǧa mäjbürmın deidı. Kredit keŋırdekten, ösım pūl alqymnan aldy dep jylaidy, dep habarlaidy «Astana» telearnasy.  31 jastaǧy kelınşektıŋ alty balasy bar. Jūmyssyz. Joldasynyŋ tabysy ışıp-jemnen artylmaidy. Sondyqtan äiel şiettei bala-şaǧanyŋ kem-ketıgın tügendeimın dep jürıp qaryzǧa belşeden batqan.Ony qaitara almaidy. Bereşegın sūrap künde bıreu keledı. Bar tapqan amaly – büiregın satyp, qaryzdan qūtylu. «Sebebı jaŋaǧy kısıler üige künde kelıp mazalaidy. Tıptı kışkentai bır jasar qyzymdy da «bızge ber, otkaz jazyp ber» dep aitty. İä, «balany maǧan ber, aqyry tölei almaisyŋ» deidı. Kım balasyn qiyp beredı? Aityŋyzşy, qandai jaǧdai bolmasyn, eşkım balasyn qimaidy ǧoi. Sonymen qatty nalydym», - deidı Qyzylorda qalasynyŋ tūrǧyny. Kelınşektıŋ aituynşa, aǧzaǧa qara naryqta sūranys bar. Künde habarlasyp, büirektı saudalaityndar köp. «Jetı milion teŋge dep aittym. Maǧan bır kısı habarlasyp, balasynyŋ büirekke zäru ekenın aityp, tegın beruın sūrady. Men ony tegın beretındei öleiın dep jatqan joqpyn ǧoi. Tegın berıp ketemın deitındei. Özım amalsyz, mūqtaj bolyp tūrmyn, renjımeŋız dedım. Aqysyna ǧana beremın dedım. Odan keiın de bırneşe adam habarlasty», - deidı tūrǧyn. Ranker.com saitynyŋ mälımetı boiynşa, qara bazarda büirektıŋ baǧasy AQŞ-ta 200 myŋ dollar tūrady. Al Qytai men Ündıstanda būdan säl arzan. Barlyq elde de büirekke sūranys joǧary. Nūr-Sūltandaǧy transplanttau ortalyǧynyŋ mälımetınşe, büirek jetıspeuşılıgımen esepte tūrǧandar sany üş myŋnan asady. Ökpe, bauyr, jürekke de sūranys joq emes. Ortalyqta aǧzany auystyru tegın jürgızıledı. Ol üşın donorlarǧa aqşa tölenbeidı. Tek zaŋdy jolmen, tiıstı talaptarmen ǧana qabyldanady. Al öz erkımen dene müşesın saudalaǧandar jazaǧa tartylady. «Adamnyŋ aǧza müşelerı men tinin aluǧa mäjbürleu nemese zaŋsyz alu faktılerı Qazaqstan Respublikasy Qylmystyq kodeksınıŋ 116-baby boiynşa tergeledı. Däl osy qylmystar abaisyzda jäbirlenuşinıŋ ölımıne nemese özge de auyr zardaptarǧa äkep soqqan jaǧdaida nemese mūny qylmystyq top jasaǧan bolsa, segız jyldan on ekı jylǧa deiingi merzimge bas bostandyǧynan aiyruǧa jazalanady», - dedı QR Işkı ıster ministrınıŋ keŋesşısı Nūrdıldä Oraz. Psiholog mamandardyŋ pıkırınşe, qarjylyq qiyndyqtar tuyndaǧan kezde adamnyŋ mınez-qūlqy özgeredı. Būl ony türlı äreketke itermeleuı mümkın deidı. «Eŋ aldymen, şarasyzdyqtan baratyn şyǧar. Ekınşıden, menıŋşe, adam özın-özı qūnsyzdandyryp, «Ömırde qūndy dünie joq» dep oilauy mümkın. Qazır qūndylyqtar qatty tömendep kettı ǧoi. Būl da bır sonyŋ körınısı dep aituǧa bolady», - deidı psiholog Limana Qoişieva. Qanşa jerden joqşylyq jaǧadan alyp, ösımpūl aiaqtan tartsa da, zaŋsyz äreketke jol joq. Jaza auyr. Bıraq ony eşkım eskermeitın sekıldı. Bas prokuraturanyŋ Qūqyqtyq statistika jäne arnaiy esepke alu jönındegı komitetınıŋ mälımetınşe, adam aǧzalaryn saudalau boiynşa ötken jyly elımızde 57 qylmystyq ıs tırkelgen.