Mahatma Gandı atyndaǵy №92 mamandandyrylǵan lıeıde belgili jazýshy, «Qyltusaý», «Jalǵyz juldyzdyń jaryǵy», «Taǵdyr taqtasy» áńgimeler jınaǵynyń avtory Darhan Beısenbekpen «Búgingi ádebıet jáne jastar» atty kezdesý ótti. Mektep ustazdary men oqýshylary jazýshynyń shyǵarmashylyǵy men búgingi ádebıet týraly kóptegen suraqtar qoıyp, oǵan tushymdy jaýap aldy.
«Almatyǵa oqýǵa tapsyrýǵa kelgen kúni dalaǵa túnep, ertesine Qanysh Sátbaev atyndaǵy tehnıkalyq ýnıversıtetine oqýǵa túsýdi uıǵardym. Oǵan sebep – jataqhana máselesi boldy. Tehnıkalyq mamandyqqa oqýǵa túskenimmen, áý bastaǵy armanym boıynsha ýnıversıtet gazetinde jumys istep, jazýshylyqqa bet burdym» dep Darhan Beısenbekuly óziniń ádebıetke kelý tarıhyn baıandap berdi. Ol oqýshylarǵa naǵyz kórkem ádebıetpen sýsyndap qalatyn ýaqyttary osy kez ekendigin aıtty.
Suraq-jaýap formatynda ótken kezdesýde jazýshy birneshe máselelerdi qozǵady. Sonyń biri – qalamgerler men oqyrmandar máselesi. Bul turǵyda ol «qalamger – ónim usynýshy. Oqyrman – tutynýshy. Demek, tutynýshynyń talǵamy bıik bop tursa, ónim usynýshynyń talǵamy da ózgerýi kerek» deıdi. Sondaı-aq, jastarǵa búgingi jas jazýshylardyń, atap aıtqanda E.Aıdabosyn, Q.Tileýhan, Q.Ábilqaıyr syndy azamamattardyń shyǵarmalaryn oqýǵa keńes berdi.
Kezdesý sońynda lıeı dırektory Erulan Jıenbaev qonaqtardy qabyldap, aldaǵy ýaqytta da osyndaı mańyzdy is-sharalardy ótkizip turýǵa shaqyrdy.
Al qazaq tili jáne qazaq ádebıeti pániniń muǵalimi Almagúl Tákisheva jazýshymen bolǵan kezdesýdiń oqýshylar úshin mańyzdy ekenin jetkizdi.
«Darhan Beısenbekuly «Qyltusaý» romanynda qazirgi jastardyń ómirindegi ózekti máselelerdi, ǵasyr dertine aınalǵan nashaqorlyq, qyztekelik, qoǵam ómirindegi baýyr eti balasyn shetelge satý sııaqty máselelerdi kótergen. Roman tili dıalog arqyly jeńil oqylady. Jazýshymen ótken kezdesý oqýshylardy qanattandyrady dep oılaımyn» dedi ol.
Aıta keteıik, «El-shejire» qoǵamdyq qory uıymdastyrǵan bul kezdesý Almaty qalasy Ishki saıasat basqarmasynyń tapsyrysymen ótti.
