Qaraǵandy oblysynyń salyq ınspekııasy men Qazaqstan Respýblıkasynyń Energetıka jáne kommýnaldy sharýashylyq basqarmasyna AShYQ HAT!
"Ulytaýǵa bardyń ba, Ular etiń jediń be?!" degen el aýzyndaǵy sózdi estimegen jan joq shyǵar. Sol tabıǵaty kórkem, qazba-baılyqtardyń kózine aınalǵan, aýasy saf, sýy móldir, kıeli Ulytaý halqynyń turǵyndarynyń basym kópshiligi búginde jaryq pen sýǵa zar bolyp otyr. Ulytaý turǵyndarynyń aıtýynsha, jaryq pen sýdy Ulytaý aýdanynyń kommýnaldy sharýashylyq bólimi jylda sebepsizden sebepsiz sóndirip tastaıtyn kórinedi. Odan keıin egistik sýarý bylaı tursyn, bir jutym sý tappaı seńdeledi eken. Kommýnaldy sharýashylyq bóliminiń býhgalteri Dánıza Nurjıgıtova bul jaǵdaıdy Ulytaý aýdanynyń memleketke 271 mıllıon bereshegi bar ekendigimen baılanystyrady. Al «shaǵyn ǵana aýdan qalaısha sonsha somaǵa qaryzǵa batty?» degen suraqqa aýdan basshylyqtary mardymdy jaýap bere almaýda.
Turǵyndar jyl saıyn ákimshilikke sý men jaryq máselesin retteý úshin bólinetin qarjynyń qaıda jumsalyp jatqanyń túsinbeı dal bolýda. Olar kommýnaldy sharýashylyq bóliminiń qyzmetkerleri bul jaǵdaıǵa kináli emes ekendigin tilge tıek etip, «mekeme qyzmetkerleri jalaqy almaı júrgenine birneshe aıdyń júzi boldy», - deıdi.
Qordalanǵan másele Ulytaý aýdanyna ár ákim qaralar kelgen saıyn qaýzalatyn kórinedi. Alaıda esh ózgeris bolmaǵan soń turǵyndar da úmitin úzgen. «Osy joly jańadan taǵaıyndalǵan ákim Sovetbek Medebaev ta sý men jaryqty jóndeý máselesinde qımyldaıyn demeıdi», - deıdi turǵyndar.
Al «kommýnaldy sharýashylyqqa jaýapty basshy Hamzat Abýdallaevıch sý men jaryq qashan qosylady» degen turǵyndardyń kún saıyn qoıǵan saýalyna nemquraılylyq tanytyp, tolassyz hattarǵa jaýap bermeı, tipti tutqa da kótermeıtin kórinedi. Tipti WhatsApp áleýmettik jelisinde «KOMHOZ jarnamasy» degen atpen arnaıy ashylǵan toptyń búginde 255 múshesi bar eken. Barlyǵynyń derlik kúndiz-túni jazyp jatqan máselesi Qudaıdyń qara sýy men bir syǵyraıǵan jaryǵy qana (toptaǵy tolassyz hattar legi tómende kórsetilgen).
Alaıda «Aıta-aıta Altaıdy, Jamal apam qartaıdy» degendeı Ulytaý aýdanynyń ákimdigi de, kommýnaldy sharýashylyq bóliminiń basshylyǵy da turǵyndar úshin tyrnaqtaı áreket jasamaýda. Qysqasyn aıtqanda, aty dardaı Ulytaýdyń zaty dardaı bolmaı tur. Atalǵan máseleni Qaraǵandy oblysynyń salyq ınspekııasy, Qaraǵandy oblysynyń turǵyn-úı kommýnaldy sharýashylyq basshylyqtary, Qazaqstan Respýblıkasynyń Energetıka jáne kommýnaldy sharýashylyq basqarmasy, QR-nyń Qarjy mınıstrliginiń salyq komıteti, QR-nyń sybaılas jemqorlyqpen kúres is-qımyl agenttigi nazarǵa alyp, bir sheshimin taýyp berýin ótinip suraımyz.
"Ulytaý" aýdanynyń turǵyndary,
"Adyrna" ulttyq portaly
