Bıyl Mańǵystaý jerindegi «Otpan» tarıhı-mádenı keshenine - 10 jyl. Osyǵan oraı, oblys kóleminde merekelik sharalar uıymdastyrylyp, keń kólemde atalyp ótti.
Elbasy Nursultan Nazarbaevtyń «Rýhanı jańǵyrý» baǵdarlamasy aıasynda «Úsh júzdiń tóbe bıleri» atty monýment kesheni ashylyp, ǵylymı-praktıkalyq konferenııa, qolóner sheberleriniń respýblıkalyq kórme-jármeńkesi men ulttyq oıyndardyń jarysy uıymdastyryldy. Elbasy maqalasynda «Árbir halyqtyń, árbir órkenıettiń barshaǵa ortaq qasıetti jerleri bolady, ony sol halyqtyń árbir azamaty biledi. Bul – rýhanı dástúrdiń basty negizderiniń biri. Biz – ulanǵaıyr jeri men asa baı rýhanı tarıhy bar elmiz» degen bolsa, osy turǵydan alǵanda Otpan taý – tek qazaq halqy úshin ǵana emes, kıeli túbekti bizge deıin de jaılaǵan jeti jurt úshin qymbat meken. Otpan taýdyń ejelden arqalaǵan maqsat-mindeti bar. Ol - yntymaq pen birlik saqtaý jáne aǵaıyn arasyndaǵy tatýlyq týyn tik ustaý. Keshenniń ıdeologııalyq kórinisi – el prezıdenti Nursultan Ábishuly usynǵan «Máńgilik El» tujyrymdamasymen úndesip, ult birliginiń ajyramas bólshegi sanalady.
- «Otpan taý – kópultty Otanymyzda taǵdyr tabystyrǵan ózge ult ókilderi úshin de qasterli nysan. Baıqaǵan adamǵa munda is júzinde, qazaqstandyq ult ıdeıasy júzege asyrylyp jatyr. Jańadan ashylǵan «Úsh júzdiń tóbe bıleri» monýmentiniń tuǵyry da osyndaı bıik ıdeıalardy kózdegen asqar taýdyń basy bolmaq kerek. Munyń bári tutasa kelgende halqymyzdyń ulttyq biregeıliginiń myzǵymas negizin quraıdy. Sondaı-aq ol, Otpannyń ulylarymyzdyń ónegeli jolyn nasıhattaý arqyly jas urpaqtyń sanasyna ulttyń genetıkalyq kodyn sińirip, «Máńgilik el» strategııasy negizderinde tárbıeleýde atqarǵan róli zor. Otpan taýdy qazaqtyń qarashańyraǵynyń otaýy desek, búgingi «Úsh júzdiń tóbe bıleri» monýmentiniń Otpan taýdan oryn tebýi zańdylyq. Ulylardyń ulaǵaty urpaqtyń júregine uıalasyn! Ulttyq kodty sińirý degenimiz – mine, osy, - dedi Mańǵystaý oblysynyń ákimi Eraly Toǵjanov.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
