Jalqy mergen

1994
Adyrna.kz Telegram

(Esse)

«Turady aıtqan sózinde,
Keledi aıtqan kezinde...»

Jýrnalıster qaýymynyń ishinde fototilshilerdiń orny bólek. Bul kásipti serik etkender sonshalyqty kóp emes. Bir basylymda ádette bir ǵana fototilshi bolady. Sondyqtan ol búkil ujymnyń erke balasy sekildi erkin júredi. Ernazardyń segiz ulyna tatıtyn Ertóstik sııaqty. Áriptesteriniń bári sonyń aýzyna qaraıdy.

Jalpy, fototilshi degen óte qyzyq halyq. Árqaısysy ózinshe bir álem. Olardyń minez-qulqy da árkelki. Biri toı-tomalaqty qur jibermeıtin saýyqqoı, ekinshisi basynan qus ushyrmaıtyn seri, úshinshisi aýyzdyǵa sóz bermeıtin sheshen, tórtinshisi jelge qarsy qarap turyp túkiretin qyńyr... Qaı-qaısysynyń da sońynan ańyz erip júredi.

Men birde tanymal eki fototilshiniń tóbeleskenin kórdim. Bulardyń judyryqtasqanyna deıin qyzyq. Belgili bir kásip ıeleri qyzmet barysynda kerildesip qalsa, qarsylasyna qural-saımanyn jumsaıtynyn kórip júrmiz. Mysaly, jumysshylar bir-birine kúrek ala umtylady. Shoferler máshıneni jóndeıtin beltemirdi syǵymdap ustap, doq kórsetedi. Sol sekildi mynalar bir-birin fotoapparatpen qulaq shekeden qondyratyn shyǵar dep oılap em. Joq, bular ondaı aqymaq emes eken. Ekeýi de jekpe-jekke shyǵardyń aldynda asaı-múseılerin qaýipsiz jerge qoıyp keldi. Sosyn qoıǵylasty-aı kelip. Sonyń ózinde fotoapparattaryn qaldyrǵan jerden aýlaǵyrap baryp shaıqasty. Ashýdan kózderi kórmeı, bir-biriniń jeti atasyn túgeldep jatsa da, bar baılyǵyn maıdan alańynan alystaý ustaýǵa tyrysty.

Qazaq jýrnalıstıkasynda óz qoltańbasyn berik qaldyrǵan fototilshiler jetkilikti. Kúlkisi kúlli álemdi dirildetetin Rysqalı Dúısenǵalıev, salmaqty da sabyrly, sergektikti serik etken Nurǵoja Jubanov, eshkimniń ataq-abyroıyna qaramaı irep soıatyn, birqaqpaılary el ishine ańyz bop taraǵan Saılaý Pernebaev, bir qaraǵanda qazaq jurtyn asyqpaı aralap júrgen eýropalyq sekildi áser qaldyratyn, syrbazdyǵy men symbaty bólek Nurmanbet Qızatov, júrgen jerin toı-dýmanǵa aınaldyrmasa ishkeni as bolmaıtyn Rahymbaı Hanaly jáne basqalar fotojýrnalıstıkaǵa búkil ǵumyryn arnady.

Sondaı aty ańyzǵa aınalǵan fototilshiniń biri – Denderbaı Egizov. Orys jýrnalıstıkasynda bir taqyrypqa beıimdelgen fototilshiler jetip artylady. Al qazaq baspasózinde Egizovten basqa bir ǵana taqyrypty qaýzaǵan fotojýrnalıst bolǵan emes. Ol qazaqtyń sport fotojýrnalıstıkasynyń negizin qalady. Bir ǵana basylymda – respýblıkalyq «Sport» gazetinde qyzmet istedi. Ol kisi sekildi óz isine jan-tánimen berilgen adam sırek.

Jalpy, fotojýrnalıster – qudaıdyń erkesi. Qajet sýretin alý úshin el únemi olardyń sońynan qýalap júredi. Al Egizov ondaılardyń sanatyna jatpaıdy. Suratqan sýretińdi aldyńa qaptatyp ózi ákelip tastaıdy. Ýádelesken ýaqytynan bir mınýt ta keshikpeıdi. Jarasqan aqynsha tolǵasaq: «Turady aıtqan sózinde, Keledi aıtqan kezinde». Qara basyp, keshigip qalsaq, kózildiriginiń astynan kózi shegireıip, saǵan ıt kórgendeı qaraıdy. Sol qaraǵanynyń ózi jetedi. Jerge kirip kete jazdaısyń. Esesine ekinshi qaıtara keshikpeısiń. Keıbir fotojýrnalısterdiń serilik quryp, kóbelek qýyp ketýiniń saldarynan gazetke qajetti sýret shyqpaı qalyp jatady. Dákeń ondaıǵa eshqashan jol bermeıdi. Qaıta ol óziniń jaýapkershiligine ózgelerdiń ilese almaıtynyna qınalady. Bir kezde shet tilderi ınstıtýtynda nemis tili mamandyǵyn ıgergen Denderbaı Egizovke nemis jurtynyń alabóten dáldigi juǵysty bolǵan tárizdi.

Qazaqtyń mańdaıyna bitken sport jýrnalısteriniń ózi sonshalyqty kóp emes. Ádepkide eńbek jolyn osy saladan bastap, dúnıeni dúbirletken halyqaralyq dodalardyń birazyn kózimen kórip, qany qyzyp turǵan reportajdar usynǵan jigitterdiń kóbi qazir basqa salada júr. Al bul kisi óz arnasynan eshqaıda burylǵan joq. Bir ǵana soqpaqpen júrdi. Óziniń sony súrleýin saldy. Sport jýrnalıstıkasyn ıgerý úshin týdy. Sport fototilshisi bolyp ómirden ótti.

Denderbaı aǵa tutas bir tarıhı dáýirdiń fototilshisi boldy. Ol keńestik kezeńniń baýyrynda otyrǵan ultymyzdyń sport shejiresin jasady. Onyń kez-kelgen sýretinen qasy-kózi qap qara qazaqtyń ulany men boıjetkeni qarap turady. Ol sondaı-aq elimiz táýelsizdik alǵan jyldardan bastap ómiriniń sońyna deıin tynym kórmeı, erkin el sportynyń fotojylnamasyn jazdy.
Turqy shaǵyn bolǵanymen minezi shaqar edi. Basynan sóz asyrmaıdy. Sumdyq kúıgelek. Bireýlerdiń uqypsyzdyǵyna, ıis almas qamsyzdyǵyna kúıinedi. Eńbektenbeı ońaı olja tapqysy keletinderge nazalanady. Jankeshti jumysyn baǵalaǵysy kelmeıtinderge qyrsyǵady. Bir qısaısa, qatyp qalady. Sosyn ony jibitem degenińshe jarty jyl ótedi. Qyńyraıyp otyryp-aq talaılardy tezge salady. Biraq sol minezimen elge unady. Óıtkeni, Egizovtiń eki shoqyp, bir qaraıtyn saqtyǵy men uqyptylyǵynyń arqasynda qazaq sportynyń teńdesi joq fotoshejiresi hatqa tústi. Elýinshi jyldardan bastap el ishindegi jáne halyqaralyq deńgeıdegi sport jarystaryn qalt jibergen joq. Táýelsizdik qolǵa tıgen soń talaı eldiń esigi Egizovke aıqara ashyldy. Tek bul kezde fototilshiniń jasy ulǵaıyp, mańdaıyn ájim torlaı bastaǵan edi. Onyń ústine zeınet jasyna jaqyndaǵanda jarysqa asyǵyp bara jatyp, súrinip qulap, aıaǵyn jaraqattap alyp, ábden zardap shekti. Biraq soǵan qaramastan shetel saparlarynan bas tartqan joq. Jazǵysy bar, qysqysy bar, sońǵy jıyrma bes jyldaǵy Olımpıadalar men Azııa oıyndarynyń bárine kýá boldy. Jarysqa jýrnalıst bop barý – serýendep qaıtý emes. Halyqaralyq iri sport saıystaryna seni tumsyǵy bir tutam fotoapparatyńmen kirgizbeıdi. Qural-saımanyńa jarty qulash obektıv jalǵap alǵan soń ǵana jarystarǵa jol ashylady. Al onyń asaı-múseıleriniń ózimen-aq tolatyn aýyr sómke eńgezerdeı jigitke de ájepteýir júk bolar edi. Osydan keıin boıy bir qarys, juqaltań ǵana Dákeńniń jaǵdaıyn túsine berińiz. Biraq shymyr shal sonda da qyńbaıdy. Tańǵy alageýimnen turady. Sómkesin tyrmyshtap asynyp, uzyn obektıvin arqalap, jarysqa attanady. Qalanyń ár qıyrynda ótetin saıystardyń bireýin de qalt jibermeıdi. Bárine úlgeredi. Sosyn sýretterin shyǵarý úshin keshtetip baspasóz ortalyǵyna ketedi. Ony túndeletip elge joldaıdy. Sóıtip, qonaq úıge tún ortasy aýǵan shaqta bir-aq jetedi. Bul kezde Dákeńniń sheteldik áriptesteri meımanhananyń meıramhanasynda syzdyqtatyp syra iship otyrady. Birde-biri bizdiń shal sııaqty janyn qınamaıdy. Kúnde osy. Kúni boıy taý-tasqa órmelegendikten ábden sińiri sozylǵan aıaq túnimen syzdaıdy. Soǵan qaramastan erteńine eleń-alańnan taǵy da jolǵa shyǵady.

Men Denderbaı Egizovpen Japonııada ótken on ekinshi Azııa oıyndarynda jáne Taılandta ótken on úshinshi Azııa oıyndarynda birge boldym. Táýelsiz eldiń sport salasyndaǵy jańa jetistikteriniń jylnamasyn jasaýǵa birge atsalystyq. Shaqar shaldyń ózin aıamaıtyn adam aıtqysyz jankeshtiligine talaı ret kýá boldym.

Egizovtiń «egizi»

Aýyr atletterdiń saıysyn tamashalap, keshtetip qonaq úıge qaıtyp kele jatqan betim. Hırosımanyń záýlim ǵımaratynyń esigi aldynda eńsesi túsip, abyrjyp turǵan myna bir japon Denderbaı Egizovten aýsaıshy. Qaraımyn da kúlemin. Týra ózi. Seldir shashy, múıiz kózildirigi, qamyt aıaǵy, eńkish jaýyryny kózime ottaı basylyp, janynda aınalshyqtadym da qaldym. Japonymnyń menimen sharýasy joq, eki qolyn artyna ustap, sabyrsyzdanyp, áldenege alańdap júr. Dákeń de mynaý sııaqty naǵyz mazasyz edi, bolmashy nársege qabaǵy kirjiń-kirjiń etip, shyj-byj bolatyn da qalatyn.

Alyp ǵımarattyń aldynan aınalshyq jegendeı shyǵa almaı júrgen bákene boıly japonǵa qarap turyp, elde qalǵan Dákeńdi oıladym. Jumyr jerdegi talaı eldiń topyraǵyna tabany tıgen Denderbaı Egizovke bul joly Japonııaǵa jetýdiń sáti túspedi. Kúnshyǵys elin kóremin dep jyl boıy daıyndalyp edi. Qarajat joqtyǵy qolyn baılady. Demeýshi bolam degen iri sport mekemeleri ýádeden taıqyp ketti.

Qaljyń dese ishken asyn jerge qoıatyn Dákeńe ózinen aınymaıtyn japon kórgenimdi jyrdan qyzyq qylyp aıtyp beretin boldym endi. Fototilshiniń rahattanyp turyp kúletinin kózge elestetem. Ózi erip kelgende, tolǵaq qysqandaı typyrshyp júrgen myna bireýdi kórgende kózi atyzdaı bolar edi-aý deımin.

O toba, soıyp qaptap qoıǵan Denderbaı! Qoı, janyna baraıyn. Erteń elge barǵan soń maıyn tamyzyp áńgime aıtý úshin de «materıal» kerek qoı. Hırosımaǵa kelgeli úırengen bar japonshamdy taýysyp, sóılesip kórsem be eken? Kúnshyǵys elinde qulaǵyńa jıi estiletin «sımesan» men «aregatoǵa» aýzymyzdyń jyp-jyp etip, úırenip-aq qalǵan kezi.

 

Qasyna bara bergenim sol edi, Egizovtiń «egizi» bireý tóbesinen qos qoldap urǵandaı turǵan ornynda sileıip qaldy. Kózáınektiń arǵy jaǵynan jylt-jylt etken eki kózi mende. Ne bop ketti ózi?! Alasa boıly japonym ańyrǵan keıpi áli tur. Endi men daǵdardym. Bir kezde álgi seldir shash kisi shińk-shińk etip:

– Áı, ıt, bul men ǵoı, – dep qushaǵyn jaıa umtylǵanda qulap qala jazdadym.

...Taqtaıdaı tegis trotýarmen Denderbaı aǵanyń tórt dóńgelekti nán shabadanyn dyryldatyp súırep kelemin. Ol bolsa, meni tas qylyp qoltyqtap alǵan, aıyrylyp qalardaı jibermeıdi. Aǵyl-tegil, pora-pora... Juldyzqurttaı jarqyraǵan kósheniń sansyz shamdarynyń sáýleleri Dákeńniń jasqa shylanǵan júzinde oınaıdy. Jylap keledi, jabyǵyp keledi.

Nege jylamasyn... Almatynyń áýejaıynan bizdi Japonııaǵa shyǵaryp salyp, eńsesi túsip, ezilip bara jatqan Dákeńdi kórgen qarymdy sport jýrnalısi Qydyrbek Rysbekuly qaıratqa minedi. Qalamy men qaǵazynan bý shyǵaryp, býdaqtatyp jazǵan janaıqaı sózin «Jas alashtyń» sol kúni qattalyp jatqan nómirine úlgertip jiberedi. Erteńine táýelsiz eldiń tuńǵysh sport delegaııasy Kúnshyǵysqa aman-esen attanyp ketkeni týraly aqparat quraldarynyń jarysa jarııalaǵan habarlarynyń ishinen «Egizovti qaldyryp ketti!» degen replıka Sport mınıstrliginiń tóbesinen jaı túsirgendeı bolady. Qazaqtyń mańdaıyna bitken jalǵyz sport fototilshisiniń jol qarajatyn kóteremiz dep jyl boıy ýáde berip, jeme-jemge kelgende sózden taıyp ketken basshylardan ne úmit, ne qaıyr?! Qydyrbektiń ár sózi shıyrshyq atyp turǵan shaǵyn maqalasynyń aıtary osy. «Jas alashtyń» qaı sózi aıaqsyz qalyp edi? El aǵalary eleńdesedi. Jankúıerler telefon shalady. Tileýles jandar tolyq qulaqtanady.

Úlkendi-kishili esikterdiń tabaldyryǵyn tozdyrǵan tórt-bes kúndik sabylys Denderbaı Egizovti Japonııaǵa jiberýge sheshim qabyldanýymen aıaqtalady. Búgin Sport mınıstriniń ózimen birge ushyp kelipti. Mınıstr Birǵanym Áıtimova hanymnyń shashbaýyn kóterip, úkilep kútip alǵan sheneýnikter shýlasyp júrip, Dákeńdi eleı qoımaǵan. Hırosımanyń bir qaltarysyna kelgende, «Qazaqstandyq jýrnalısterdiń tirlik keship jatqan jeri shamamen osy mańaı, ári qaraı ózińiz birdeńe etip jetersiz», – dep, bizdiń sheneýnikter qazaq jýrnalısin japon kóliginen túsirip, ııý-qııý kóshege qaldyryp ketedi.

Óldim-taldym dep ázer tapqan baspasóz ortalyǵyna bas suqsa, munda Egizov degen famılııa múlde tirkelmepti. Sirá, kelmeıdi degen soń esep-qısabynan jańylmaıtyn japondar tizimnen syzyp tastasa kerek. Máseleni baıandap, uzyn-sonar oqıǵany táptishtep jatýǵa til qaıda? Ortalyq Azııa memleketteriniń ókilderine qyzmet kórsetetin japondardyń orysshasy nan suraýǵa da jaramaıtyn kórinedi.

Temirdeı tártipti tas túıin etip ustanǵan japondar tizimde atyń bolmaǵan soń bosaǵadan attatpaıtyny belgili. Qashan tolyq tirkeýden ótkenshe baspasóz ortalyǵynyń da, qonaq úıdiń de, sportshylar meken-jaıynyń da esigi tars jabyq. Minez-qulqy, ádet-ǵurpy jaǵynan eptep bizge úıleskenimen, «qudaıy qonaq» degendi bul japonyń bilmeıdi. Alystan at arytyp kelgen meımanyn tanymasa da tórge ozdyratyn qaıran qazaqtyń umytylyp bara jatqan osy bir qudiretti saltynyń qadirin Dákeń jyraqtaǵy japon elinde uqqandaı bolady.

Sóıtip, qaıran aǵam qaıda bararyn bilmeı, mıllıondaǵan halqy bar Hırosımanyń kóshesinde qaırańda qalǵan balyqtaı qınalyp turǵan sátte qarsy aldynan qańǵalaqtap kele jatqan men jolyǵyppyn.

– Seni maǵan qudaıdyń ózi kezdestirgen shyǵar, – deıdi Dákeń kóz jasyn súrtkishtep. – Jańaǵy bireýlerdi syqpyrtyp sybap tur edim...

– Dáke, bir qyzyq áńgime aıtaıyn ba?, – deımin qamkóńil áriptesimdi kóńildendirgim kelip, – Baıaǵyda bizdiń Araldyń eki balyqshysy Máskeýge halyq sharýashylyǵy jetistikteriniń kórmesine barypty. Jolbasshy bolyp júrgen eldiń bir azamaty álgi ekeýin metronyń kirer aýzyna otyrǵyzyp qoıyp, «men kelgenshe osy jerden qozǵalmańdar» dep eskertip, jaqyn mańdaǵy mekemelerdiń birine ketedi. Biraq barǵan sharýasy bite qoımaı, birer saǵat aınalyńqyrap qalady. Qaıtyp kelse, bizdiń Qaratereń men Bógenniń arasynan uzap shyǵyp kórmegen álgi eki qart bir-birin tas qyp qushaqtap: «Eldi qaıdan tabamyz, jerdi qaıdan tabamyz?», – dep eńkildep jylap tur deıdi...

– Ketshi-eı, seniń de aıtpaıtynyń joq eken!

Ózin meńzep turǵanymdy túsingen Dákeńniń jipsıgen kózderi kúle bastady.
Qonaq úıdiń qýyqtaı bólmesine kirsek, «Ekspress K» gazetiniń tilshisi Sergeı Fılımonov meıman keletinin bilgendeı dastarhan jaıyp jatyr eken. Stoldyń ústinde shaǵyndaý bir-eki qutynyń moıny qyltııady.

– Mynaýyń ne?

– Bul – japon araǵy. Ystyqtaı ishetin «sake» degen ishimdik.

– E-e-e... Bul japonnyń sakesi bolsa, men qazaqtyń Dákesimin, – dep Denderbaı Egizov tórge qaraı oza berdi.

Almatyda júrgenniń ózinde ara-tura toı toılap turmasa ishkeni as bolmaıtyn Denderbaı aǵa Japonııaǵa kelgen soń ne joryq, otyrys qyzyp júre berdi.

Teledıdar túngi jańalyqtardy dúrkiretip, damylsyz habarlap jatyr. Dıktorlardyń aýzynda eki-aq aýyz sóz: «Hıroshıma», «Azııa taıkaı» (Azııa oıyndary). Mine, bizdiń jigitter de kózge shalyndy. Qýanysh Rymqulov samaıynan ter shúmektep turyp, taǵy bir aýyr salmaqty kóterip ketti. Áne, Anatolıı Hrapatyı ekranǵa syımaı, jardaı bolyp tur.

– Mınıstrdiń ózimen birge ushyp keldim ǵoı, – dep maqtanyp qoıady Dákeń teledıdardan kóz almaı otyryp.

– Mınıstr qaıta sizdeı áıgili fototilshimen birge ushyp kelgenine qýanýy kerek qoı, – deımiz biz qaljyńdap.

Dákeń telefonǵa qol sozdy. Amerıka Qurama Shtattarynda oqıtyn qyzymen sóılese bastady.

– Gúlim, kúnim, aınalaıyn, aýyryp júrgen joqsyń ba? Jaman ákeń ǵoı Japonııadan...
Telefonnyń tutqasyna enip keterdeı entelep otyrǵan qoltoqpaqtaı Dákeńe qarap turyp qyzyqtym. Fotoapparatyn óńgerip, barmaǵan jeri, baspaǵan taýy joq. Máskeý Olımpıadasynan bastap, odan bergi aıtýly álemdik jarystardyń bárin derlik kózimen kórgen. Seýl Olımpıadasynyń fınalynda dańqty Dáýlet Turlyhanov pen Kım En Nam jan alysyp, jan berisip jatqanda fototilshilik quqyn paıdalanyp, boz kilemniń shetine jetip baryp, «E, arýaq, qoldaı gór!» dep aıqaıǵa basatyn judyryqtaı qazaq osy. Talaılar olja salǵan qazaq sportynyń jalǵyz fotoshejireshisi de ózi. Máskeýlik sport jýrnalısteri Almatyǵa kele qalsa, Dákeńmen tós qaǵysyp amandasady. Balalary tárbıeli. Qyzy da, uly da shet tilderine jetik.

Sol Dákeń, mine, japonnyń eki eli qaltaǵa qattaǵan qara shaıyn iship, mańdaıy jipsip, maýjyraı bastady. Moıny soraıǵan fotoapparaty kerýettiń ústinde jatyr.
Qart fototilshi osy sátte qansonarǵa shyǵardyń aldynda myltyǵyn bosaǵaǵa súıep qoıyp, damyldap otyrǵan syralǵy ańshyǵa uqsap ketti.

Kóp ishindegi jalǵyz

Denderbaı Egizov balýan inisi Dáýlet Turlyhanovtyń qamqorlyǵyn kóp kórdi. Dáýlet Dákeńniń fotokórmeleriniń bárine demeýshi boldy. Talaı halyqaralyq jarystarǵa ony óz qarajatymen attandyrdy. Egizov Dáýlettiń beldesýleriniń bárin sýretke tartty. Ataqty balýan Hırosımada chempıon bolatyn kúni Dákeń áli Japonııaǵa jetip úlgermep edi.

... Kilemnen túsken Dáýletti jabyla kóterip, aspanǵa ata jóneldik. Ózin qaqpaqyldaǵan saıyn júzi bal-bul janyp, balbyraı túsedi. Qýanyshqa kenelgen dostary balýandy bosatar emes, «Osy tarıhı sátti sýretke túsirip jatqan bireý-mireý joq pa eken?» dep jan-jaǵyma qarasam, óńkeı shetel jýrnalısteri ǵana fotoapparattarynyń uńǵysyn kezep tur. Jarǵaq qulaǵy jastyqqa tımeıtin fototilshi Denderbaı Egizovtiń qadiri osy jerde bilindi. Bolar is boldy, jankúıerler Dáýletti tómen túsireıin dep jatyr. Qolynda fotoobektıvi qos qarys kamerasy bar, shetkeri turǵan juqaltań japon jýrnalısine taqaý keldim. Kesheli beri syrtynan kórip júrmin. Óziniń nan surap jeýge jaraıtyn orysshasy bar.

– Túsirdiń be?

– Túsirdim... Ǵajap!

– Maǵan osy sýretińniń bireýin ber. Aqysyna Qazaqstannyń jalaýshasyn al. Oǵan qosa elimizdiń valıýtasyn eskertkishke bereıin. Mynaý – Qurmanǵazy, qazaqtyń uly kúıshisi.
Japonym qatty qýandy. Qurekeńniń qolyna dombyra ustaǵan beınesin kórip, «O, mýzyka, mýzyka!» dep máz boldy. Erteńine quldyrańdap jetip, suraǵan sýretimdi ákep berdi. Sóıtip, Dákeń Japonııaǵa jetem degenshe óstip kún kórgenbiz.

Taıland saparynda Dákeńniń eptep sharshaǵany baıqaldy. Soǵan qaramastan Azııa oıyndarynyń negizgi bazasy sanalatyn Tamasat ýnıversıteti qalashyǵyndaǵy jyqpyl-jyqpyl taý-tas, tóbe-qyrattardyń bárine órmelep shyqty. Baspasóz ortalyǵynda Egizovti tanymaıtyn fototilshi joq. Qushaqtaryn aıqara ashyp, bári de shetinen bizdiń shaldy qonaqqa shaqyryp jatady. Sol jyldarda Dákeń álemniń sport fototilshileriniń batagóı aqsaqalyna aınalyp úlgerdi-aý deımin. Áıteýir ózge jurttyń oǵan degen qurmeti alabóten boldy.

Ózi bir aýyz aǵylshynsha bilmeıdi. Ary ketse, on sózden turatyn kárisshesi, qyryq-elý sózdi ǵana quraıtyn nemisshesi bar. Sóıte tura, tildi jetik biletin áriptesterimen eki-úsh saǵat boıy tartysyp, álemdik fotojýrnalıstıkanyń problemalaryn sheshýmen aınalysady. Qalaı túsinisetinin bir qudaıdyń ózi biledi. Tilge qyrym joq dep irkilip qalǵan Egizovti kórmedim. Sol shala tilimen izdegenin tabady, qalaǵanyn alady. Ony aıtasyń, kóńilinen shyqpaǵan áldebireýlerdi jerine jetkize sybaıdy. Budan keıin oǵan tańǵalmaı kór! Ol eshkimge uqsamaıtyn minez-qulqymen de, bolmys-bitimimen de kóp ishindegi jalǵyzdaı boldy.

* * *

Jyl ótken saıyn meńdegen dertpen damylsyz arpalysyp, aqyry jeńilis tapty. Sol kezde sport sańlaqtary men jankúıerleri ómirden kimniń ótkenin túsingendeı boldy. Mamandyǵyna mundaı adal adamdy tabý qıynnyń qıyny edi. Birde jýynatyn bólmeni qarańǵylap qoıyp, túnimen sýret shyǵarypty. Jeńgemiz sony baıqamaı, jaryqty jaǵyp jibergende Dákeń álemdegi bar qapaly daýyspen aıqaı salypty. Qazir sol ay aıqaıdyń joqtyǵynan qazaq sport fotojýrnalıstıkasynyń úni shyqpaı tur.
Ataqty fototilshini en dalada jortyp júrgen jalqy mergenge uqsatatynbyz. Sońynda shákirt qalmady. Ertpegendikten emes, ermegendikten. Jumystyń qıyndyǵyna shydamaǵandyqtan. Sport jýrnalıstıkasy da sport sańlaqtary tárizdi tynbaı ter tógýdi talap etetin kórinedi.
Áıgili sport fototilshisi Denderbaı Egizovke syńar bolatyn búgingi áriptester qaıda ózi? Endi bir Denderbaı týa ma, týmaı ma? Álde, fotomyltyǵyn ońtaılap, jarystardan qalmaı júr me eken? Biraq sony baıqaı almaı turǵanymyz. Qatelesýge jazsyn... Ázirshe, jalqy mergenniń orny úńireıip tur...

* * *

Búgin onyń týǵan kúni edi... Rýhy bıik bolsyn!

Baýyrjan OMARULY
(Sýretter Asylhan Ábdiraıymulynyń fotoqapshyǵynan alyndy)

Pikirler