Atyraý oblysynyń ákimi Mahambet Dosmuhambetov jaqynda ǵana Germanııa elinde ótken lıenzııalyq týrnırde kúmis júldege ıe bolǵan paravoleıbolshylarmen kezdesti.
Aldymen sportshylardyń daıyndyq barysyn kórgen óńir basshysy, halyqaralyq jarystan júldeli oralǵan paravoleıbolshylardy jeńisterimen quttyqtady.
“Sizderdiń sportqa degen qushtarlyqtaryńyz barsha turǵyndarǵa, ásirese, jastarǵa úlgi. Elimizde osyndaı erjúrek te, qaıtpas-qaısar komanda bar ekenin maqtan tutamyz. Alda áli talaı belesterdi baǵyndyratyndaryńyz sózsiz. Búgin kúmis júlde enshileseńizder, alda altynnan alqa taǵynatyndaryńyzǵa senemin”, - dedi oblys ákimi.
Toqsan paıyzy Atyraý oblysynyń sportshylarynan quralǵan paravoleıboldan ulttyq qurama 1-5 maýsymda Germanııada ótken halyqaralyq paralımpıadaǵa irikteý týrnırine qatysqan bolatyn. Bes oıyn ótkizip, fınalǵa shyqqan. Aqtyq saıysta nemisterdiń quramasyna 3-1 esebimen ese jiberip, kúmis medalǵa ıe boldy.
«Bul sport túrinen álem boıynsha 72 eldiń komandasy bar. Biz solardyń aldyńǵy qatarynda kelemiz. Quramamyz kóptegen saıystarda ózderiniń myqtylyqtaryn dáleldep júr. Aıtalyq, sportshylar Qazaqstan Respýblıkasynyń 11 dúrkin chempıony, oǵan qosa Álem chempıonatynda, Azııa jáne muhıtaralyq chempıonattarda júldeli oryndarǵa ıe boldy. Jigitter áli de joǵary jetistikterge jeteri sózsiz. Sportshylarymyz babynda, aldaǵy jarystarda paralımpıadaǵa lıenzııa alýǵa múmkindigimiz bar»,- dedi paravoleıboldan QR ulttyq quramasynyń bas jattyqtyrýshy Baýyrjan Tahaýov.
Komandamen ashyq áńgime barysynda sportshylar óz máselelerin de ortaǵa saldy. Oblys ákimi tıisti sala basshylaryna tapsyrma berilip, sheshimder qarastyrylatynyn jetkizdi.
Sondaı-aq, aımaq basshysy Mahambet Dosmuhambetov elimizdiń kók týyn jelbiretip kelgen sportshylarǵa aldaǵy saıystarǵa sáttilik tileı otyryp, alǵys hattar tabys etti. Al sportshylar óz kezeginde óńir basshysyna halyqaralyq týrnırden ákelgen estelik dopty usyndy.
Aıta ketý kerek, Atyraý oblysynda paravoleıbol 2002 jyly qurylǵan bolatyn.
