2021 jylǵy 23 maýsymda «Alataý» dástúrli óner teatrynda «Altybaqan» oıyn-saýyq án keshi (Teatr dırektory: Rınat Zaıtov, Qoıýshy-rejısser: Juldyzbek Jumanbaı) ótti.
«Til jetkizbesti án jetkizeri de bar», – deıdi Ǵabıt Músirepov. Ánniń de óz qudireti bar ekeni sózsiz. Ultymyzdyń maqtanysh eter asyl murasy, rýhanı jádigerleri ishinde zamana súzgisinen ótip, búgingi urpaqqa jetken qazaqtyń dástúrli án ónerinde oryndaýshylyq, áýendik, qurylymdyq erekshelikterine baılanysty shartty túrde birneshe mektep qalyptasqanyn bilemiz. Bul keshte bes mektep boıynsha (Arqa, Jetisý, Batys, Syr, Altaı-Tarǵybataı) popýrı aıtyldy. Kókbaı Janataıulynyń sózine jazylǵan Alash Ordashylardyń gımni de shyrqalǵanyn erekshe atap ótken jón:
Qazaǵym qaqtyqpa, qamalma,
El bolar qamyńdy amalda.
Partııa, surqııa, qym-qıǵysh,
Peıli aram, kóp nadan, sende de.
Jatqa jem, baı ediń, keń ediń,
Qolyńda bılik joq el ediń.
Qany jat, dini jat, jat elden,
Taıaqty jep ediń, jep ediń.
Qazaǵym birińdi biriń dos,
Kórmeseń bul istiń bári bos.
Dedi Abaı, bul qalaı, shýlamaı,
Basyń qos, basyń qos, basyń qos.
Sondaı-aq Teatrymyzdyń tolyq shyǵarmashylyq toby (70-ke jýyq artıst) qatysqan «Altybaqan» oıyn-saýyq án keshinde Alataý folklorlyq ansambli men «Kókbalaq», «Mereke-Dýman» bılerin oryndaǵan bıshilerimiz óner kórsetti.
Dástúrli ónerdi dáripteı bileıik!
Qýanysh Jumabekuly
PhD doktory,
«Alataý» dástúrli óner teatrynyń
Ádebıet bóliminiń basshysy
