Qala äkımı Mūrat Äitenovtıŋ töraǧalyǧymen ötken kezektı İnvestisiialyq ştabtyŋ otyrysynda 9 jaŋa joba ūsynyldy. Joba jetekşılerı «ZOOM» platformasy arqyly qosylyp, özektı mäselelerın ortaǧa saldy.
Mäselen, «Şymkent Temır» JŞS-ı öndırıstık quaty jylyna 300 000 tonna bolatyn üzdıksız qūiylǧan daiyndama, ūsaq sūrypty bolat jäne sozba sym öndıru zauytyn salu jäne öndırıstık quaty jylyna 360 000 tonna tıkelei qalpyna keltırıletın temır öndıru zauytyn salu turaly jobasyn ūsyndy. Atalǧan jobalarǧa «Jūldyz» industriialdy aimaǧynan 100 gektar jer bölıngen. Joba ıske qosylǧan sätte 1500 jaŋa jūmys orny qūrylmaq. Qajettı infraqūrylymdyq jüieler qosylǧan kezde qūrylys jūmystary bastalady. Qala äkımı atalǧan jobany özınıŋ jeke baqylauyna alyp, är ai saiyn arnaiy kezdesu ūiymdastyrudy tapsyrdy.
Kelesı tanystyrylǧan jobalardyŋ bırı - «Medcomfort» JŞS. Ol medisinalyq jihaz, medisinalyq jabdyq jäne medisinalyq maskalar öndırumen ainalysylady. Öndırıs iesı käsıptıŋ quattylyǧyn arttyru maqsatynda äkımdıkten jer sūrady. Şahar basşysy jaŋa industrialdy aimaqtan oryn beru jönınde şeşım qabyldady.
- Küzde «Jūldyz» industrialdy aimaǧyndaǧy infraqūrylym mäselelerı tolyq şeşıledı. Sol kezde qūrylysty bastai berseŋız bolady. Jerdı räsımdeudı sala basşylaryna jükteimın, - dedı äkım.
Sonymen bırge, ştab otyrysynda moduldı üiler salu, jekemenşık mektep salu, polietilentı qaita öŋdeu, temır-beton būiymdaryn öndıru, tūrǧyn-üi keşenın saluǧa niettıler özderınıŋ jobalaryn tanystyrdy.
Jiyndy qorytyndylaǧan Mūrat Äitenov ärbır joba apta kölemınde tereŋınen zerdelenıp, ekı tarapqa da ūtymdy şeşım şyǧarylu kerektıgın aitty.
Şymkent qalasy äkımdıgınıŋ baspasöz qyzmetı
