Shoqan Ýálıhanov atyndaǵy tarıh jáne etnologııa ınstıtýtynda «Ǵylym ordasy» mekemesi, «Ádilet» tarıhı-aǵartý qoǵamy, «Kenesary han» qoǵamdyq qory jáne Shyńǵys han atyndaǵy halyqaralyq akademııa birlesip, Kenesary Qasymulynyń týǵanyna 215 jyl tolýyna jáne ol bastaǵan ult-azattyq kóterilistiń 180 jyldyǵyna arnalǵan «Han Kene – memlekettik táýelsizdigimizdiń sımvoly» atty halyqaralyq ǵylymı-tájirıbelik konferenııa ótkizdi.
Konferenııaǵa QR Memlekettik Eltańbasynyń avtory, belgili sáýletshi Jandarbek Málibekov, QR Prezıdenti arhıviniń dırektory Borıs Japarov, tarıh ǵylymynyń doktory Klara Hafızova, QR Ortalyq memlekettik arhıvi dırektorynyń orynbasary Márzııa Jylysbaeva jáne basqa da tarıhshylar, Kenesary han men Ermuhan Bekmahanovtyń urpaqtary qatysty.
Otandyq tarıh ǵylymy týraly aıtqanda E.Bekmahanov esimin aınalyp ótý múmkin emes. Onyń ózi tańdap alǵan tarıh ǵylymyna adaldyǵy men azamattyǵy kópke úlgi. Ǵylymı basqosý kórnekti ǵalym, qazaqtan shyqqan tuńǵysh tarıh ǵylymynyń doktory, Kenesary Qasymuly bastaǵan ult-azattyq kóterilis týraly zertteýleri úshin totalıtarlyq júıeniń qurbany bolǵan Ermuhan Bekmahanov atyndaǵy memorıaldyq kabınettiń saltanatty ashylýymen bastaldy.
QR Prezıdenti arhıviniń dırektory B.Japarov kórnekti tarıhshy E.Bekmahanov kabınetine ǵalymnyń 1940-1950 jyldardaǵy tarıh salasyndaǵy qyzmetine qatysty qujattardyń kóshirmesin tapsyrdy. Jıynda E.Bekmahanovtyń kózin kórgen, dárisin tyńdaǵan shákirtteriniń atynan sóz alǵan Qaıdar Aldajumanov ǵalymnyń taǵdyry qazaq tarıh ǵylymynyń taǵdyrymen tyǵyz baılanysty ekenin aıtty. Ortalyq ǵylymı kitaphananyń májilis zalynda jalǵasqan konferenııany Eltańba avtory Jandarbek Málibekov kirispe sózimen ashty. Kenesary han ómiriniń sońǵy kúnderi jaıynda baıandama jasaǵan Sh.Ýálıhanov atyndaǵy tarıh jáne etnologııa ınstıtýtynyń dırektory Zııabek Qabyldınov patshalyq bılikpen kúresi týraly derekter keltirse, belgili tarıhshy K.Hafızova dıplomattyq qasıetterine toqtaldy. Jıynda «Kenesary han» qoǵamdyq qorynyń tóraǵasy Muhtarhan Abaǵan, QR Ortalyq memlekettik arhıvi dırektorynyń orynbasary M.Jylysbaeva, tarıhshylar M.Ábdirov, F.Shamshıdenova, R.Orazov, E.Erlanuly jáne Túrkistan qalasy Hamza atyndaǵy №2 orta mekteptiń tarıh páni muǵalimi G.Ótepbergenova Kenesary hannyń el táýelsizdigi men qazaq memlekettiligin qalpyna keltirýdegi róli, ol bastaǵan ult-azattyq kóterilisti zertteýdiń zamanaýı tásilderi jáne basqa da ózekti máselelerdi keńinen taldady.
Dına IMAMBAEVA,
"Ana tili"
