Qazaqstan men Resei «Baikal» köpmaqsatty ūşaq jasau boiynşa ǧylymi-zertteu jäne täjıribelık-konstruktorlyq jūmystardy oryndau turaly kelısımşartqa qol qoidy, dep habarlaidy “Adyrna” ūlttyq portaly Elorda İnfo saityn sılteme jasap.
Kelısımge qazaqstandyq aviasiia industriiasynyŋ bas direktory Daniiar Amangeldin men «Oral azamattyq aviasiia zauyty» AQ Bas direktory Vadim Badeha qol qoidy.
Is-şara MAKS-2021 halyqaralyq aviasiialyq-ǧaryş salony alaŋynda öttı.
«Būl kelısımge qol qoiu – bırınşı kezekte, Qazaqstannyŋ Reseimen bırlesıp aviasiia salasyn damytu nietın körsetetın qadam. Soŋǧy jyldarda respublikamyz qol jetkızgen tehnologiialyq damu bızge osy jobaǧa öz ülesımızdı qosuda belgılı bır rölge ie boluǧa mümkındık beredı», – dep atap öttı D.Amangeldin.Öz kezegınde V. Badeha «Baikal» būl ortalyq qalalardan alys ornalasqan jergılıktı jelılerde jūmys ısteuge arnalǧan jaŋa ämbebap aimaqtyq ūşaq ekenın aitty. Būǧan deiın MAKS-2021 alaŋynda alǧaş ret «Baikal» LMS-901 köpmaqsatty jeŋıl ūşaǧy tanystyryldy. Turbobūrandaly ūşaqtyŋ kreiserlık jyldamdyǧy 300 km/saǧ, ūşudyŋ eŋ joǧary qaşyqtyǧy – 3000 km, topyraqty jolaqtardan ūşudyŋ minimaldy qaşyqtyǧy – 220 m. Ūşaq kemınde 1500 km qaşyqtyqqa ekı tonna jüktemenı jetkızuge qabılettı bolady. Onyŋ baǧasy şeteldık bäsekelesterden 30-50%-ǧa tömen bolady delıngen.
