Bügın Qazaqstan Respublikasynyŋ qorǧanys ministrı, general-leitenant Nūrlan Ermekbaev özınıŋ täjıkstandyq ärıptesı, general polkovnik Şerali Mirzoǧa telefon soǧys, özara aqparat almasyp, pıkırlestı. Telefon soǧudyŋ basty taqyryby auǧan täjık şekarasy maŋyndaǧy jaǧdaidy baǧamdau bolatyn. Sonymen qatar qos eldıŋ qorǧanys ministrlerı Duşanbe qalasynda ötetın Şanhai Yntymaqtastyq Ūiymyna müşe memleketterdıŋ qorǧanys ministrlerı arasyndaǧy kezdesu mäselesın de talqylady. Qazaqstan tarapy Täjıkstanǧa şekarasyn qorǧau boiynşa kömektesuge äzır ekenın jetkızdı.
Mamyr aiynan bastap Auǧanstanda jaǧdai kürt naşarlap kettı. Oǧan Batystyq koalisiianyŋ elden şyǧatyny jaily aqparaty sebepker bolǧan edı. Baiden äkımşılıgı Tramp bastaǧan bastamany ıs jüzınde jüzege asyryp, AQŞ äskerın Auǧanstannan alyp ketetının jariialaǧan bolatyn. Alǧaşqy legı mamyr aiynda şyǧaryla bastady. Būl aqparat Auǧanstandaǧy terrorlyq toptardyŋ küş aluyna negız boldy. Atap aitqanda «Taliban» qozǧalysy bilıkke qarsy äskeri qimyldaryn eselep arttyryp, jaulap aludy ıske asyruda. Olar eldıŋ 70 paiyz aumaǧyna juyq jerdı özderınıŋ baǧynyşty aimaǧyna ainaldyrǧan. Bız üşın eŋ qauıptısı tälıbterdıŋ täjık-auǧan, türkımen-auǧan, özbek-türkımen şekarasyn öz baqylaularyna aluy. Osylaişa olar tūtastai Ortalyq Aziia şekarasyn öz baqylaularyna alyp, aimaqtyq qauıpsızdıkke qauıp töndırude.
Ortalyq Aziia memleketterı būl qauıptı naqty sezınude. 1992-1997 jyldary Täjıkstanda azamat soǧysy bolyp, aimaqtyq qauıpsızdıktı şaiqap öttı. Azamat soǧysynan myŋdaǧan adam bosqyn bolyp, Qazaqstanǧa da keldı. Täjıkstandaǧy jaǧdaidy tūraqtandyru maqsatynda Qazaqstan arnaiy bıtımgerlık küşterın täjık jerıne jıberdı. Jalpy Täjıkstanda 10500 sarbazymyz attanyp, onyŋ 57-sı qaza tapty. Qazaqstan būl qadamǧa baruǧa mäjbür boldy. Sebebı eldıŋ qauıpsızdıgı sol aimaqta qorǧalyp jatty. Mıne, araǧa şirek ǧasyr salyp sol qauıp qaita töngelı tūr. Ärine, bızdıŋ qorǧanys salasy onyŋ aldyn alu maqsatynda jūmys jasap, Auǧanstanmen şekaralasatyn Ortalyq Aziia memleketterıne kömek qolyn sozuǧa daiyn ekenın naqty bıldırude. Ejelgı türkılerde «körşıŋnıŋ üiı örtense öşır, öz üiıŋnıŋ örtengenın qalamasaŋ» degen söz bolǧan. Sondyqtan ol danalyqty ūmytpaǧan bızdıŋ memleket, ottyŋ berı ötıp ketpeuıne baryn salady. Naqty ıspen, jüielı äreketpen. Täuelsızdık jyldary qūrylǧan qorǧanys salasy oǧan tolyq daiyn, qaşandai saqadai sai tūr.
"Adyrna" ūlttyq portaly
