Sınoptıkter tamyz aıynda aýa raıynyń qalaı bolatynyna boljam jasady, dep habarlaıdy «Adyrna» ulttyq portaly.
Boljam boıynsha tamyzdyń basynda Qazaqstan aýmaǵynyń basym bóliginde aýa raıy ystyq ári qurǵaq bolady. Shyǵys pen eldiń ońtústik-shyǵysyndaǵy taýly jáne taý bókterindegi aýdandarda naızaǵaı oınap, ótkinshi jańbyr jaýady.
Eldiń batysynda, ońtústiginde, ońtústik-shyǵysynda aýa temperatýrasy túnde +20...+25°S, kúndiz +35...+42°S, soltústikte, ortalyqta jáne shyǵysta túnde +15...+22°S, kúndiz +30...+37°S bolady.
Birinshi onkúndiktiń sońyna qaraı naızaǵaı oınap, ótkinshi jańbyr bastalady.
Al ekinshi onkúndikte respýblıkanyń soltústik jartysyna sýyq aýa massalary túsedi. Bul aýa raıynyń qubylýyna ákeledi: jańbyr jaýady, taýly jáne taý bókterindegi aýdandarda naızaǵaı oınap, jel kúsheıedi.
«Adyrna» ulttyq portaly
