Soltüstık Qazaqstan oblysynyŋ Jambyl audanynda tūratyn Asyl Ahmetova 12 jasynan berı attan tüspei mal baǧyp keledı. Keiıngı kezderı auyldyŋ şynaiy ömırın beinelegen jylqyşy qyzdyŋ jazbalary köpşılık qyzyǧuşylyǧyn arttyra tüstı. Säigülık jaratyp, bäigege şapqan boijetkenge süisıngen şeteldıkter aqqaiyŋdar ölkesıne keludı armandaidy, dep habarlaidy «Adyrna» tılşısı «Qazaqstan» ūlttyq arnasyna sılteme jasap.
Jastaiynan qylqūiryqty januardyŋ babyn tapqan boijetken qalany tastap, auylǧa kelgenıne eş ökınbeidı.
Auylda 7 üiır jylqy bar. Asyl qysy-jazy sonyŋ barlyǧyn jalǧyz özı baǧa beredı. Attyŋ qūlaǧynda erkın oinaityn boijetken bäigelerge de qatysyp jür eken.
Asyl informatika pänınıŋ mūǧalımı. Jūmystan tys uaqytta jylqy baǧyp, bie bailaidy. Qoly qalt etse, ūlttyq dästür, tuǧan auyly jaily beinerolikter tüsıredı. Maqsaty - qazaqtyŋ dästür-saltyn därıpteu.
– Ekı atym bar, mūnyŋ aty Zaletnyi, ekınşısı Djungli. Būl menıŋ negızı bäigege şabatyn atym. Kışkentai kezımnen bastap jylqyǧa degen bır erekşe mahabbatym oiandy dep aitsa bolady. Özım ylǧi qastarynda jürgım keledı. Bır bailanys bolyp tūrady aramyzda, - dedı Asyl Ahmetova.Qystyŋ üskırık aiazy men jazdyŋ aptap ystyǧynda mal baǧu oŋai şarua emes. Degenmen jylqy malynyŋ qadır- qasietın tanyp ösken Asyl būl kedergılerdı oŋai eŋserıp keledı. Asyl üşın üiırdegı är jylqynyŋ orny bölek. Ärqaisysynyŋ mınezın bıledı. Sebebı qūlyn kezınen baptaǧan. Tüsırılım kezınde ekı bie qūlyndap, jetı üiır jylqynyŋ qatary taǧy köbeidı. Asyldyŋ äkesı Esenǧali Ahmetovtıŋ sözınşe, ol kışkentai kezınen jylqyny jaqsy köredı. 5 jasynan bastap atqa otyrǧyzǧan eken. Dalanyŋ tösınde erkın tynystaǧan Asyldyŋ jany jasandylyqty süimeidı. Özge qyzdar syndy opa-dalap, äşekei būiym jyltyraqqa qyzyqpaidy. Bastapqyda anasy erke ösken qyzynyŋ er azamattyŋ jūmysy dep qūryq ūstauyna qarsy bolypty.
– Äkesıne tartqan, bolmaidy jylqy-jylqy dep, baram-baram dep. Sosyn endı balanyŋ köŋılı qalaǧasyn jaraidy dedık. Oqudan kelgende, jol jürıp kelgende, jylqyny sūraidy. Üige kırmese de, sol bırınşı jylqyǧa barady, - dedı Märziia Ahmetova.Asyl bolaşaqta auyldy damytyp, ūlttyq dästürdı nasihattau üşın turistık ortalyq aşqysy keledı. Sondai-aq jylqyşy qyz jelmen jarysqan säigülıkterımen bırge tarihi kinoǧa tüsudı de armandaidy.
«Adyrna» ūlttyq portaly
