Masyldyq memlekettıŋ damuyna, örkendeuıne kerı əserın tigızedı

Är adamnyŋ özındık taǧdyry bolady. Qazaqta «Peşenege jazylǧannan eşqaida qaşa almaisyŋ» degen tüsınık bar. Memleket basşysy Qasym-Jomart Toqaev «Bız mūqtajdyq pen masyldyqtyŋ ara jıgın ajyrata bıluımız kerek. Tek Ükımet tarapynan bölınetın järdemaqyǧa qarap ömır süruge bolmaitynyn är azamat tüsıngenı jön» degen bolatyn. Alaida, mūqtajdyq turaly söz qozǧaǧanda «masyldyqtan arylu kerek» degenımız basymdau bolyp tūrǧany oilandyrady. Qoǧamda masyldyqtyŋ beleŋ aluyna jalqaulyqtyŋ əser etetının boljau oŋai. Sebebı, jatypışerlerdıŋ sany artyp barady. Ekınşı sebep, jūmyssyzdardyŋ köbeiuı. «Ekı qolǧa bır kürek tabylady» desek te, qazır jūmysqa ornalasudyŋ oŋai soqpaityny ras. Tıptı, diplomy bar adamdardyŋ özı bırden jūmysqa tūra almaidy. Būl tūsta sybailas jemqorlyqtyŋ da özındık yqpaly tiıp jatqanyn aitu kerek. Tanys-tamyr, para beru arqyly közdegen orynǧa ornalasu qazır qalypty jaǧdaiǧa ainalǧan. Mūny qoǧamnyŋ dertı demeske ne şara. Masyldyq memlekettıŋ damuyna, örkendeuıne kerı əserın tigızedı. Köŋılı qūrǧyr qazaq qoǧamynda masyldyq beleŋ aldy degenge sengısı kelmeidı, ərine. Statistikaǧa qarasaq, 8 mln. 800 myŋnan astam adam jūmys ısteitının körsetedı. Olardyŋ ışınde tūraqty jūmysy barlardyŋ sany 6 mln. 700 myŋnan asqan. Būl bır jaǧynan otandastarymyzdyŋ eŋbekten qaşpaitynyna dəlel. Ədette, keiıngı uaqytta jiı aitylatyn «Barlyq salmaqty əielder köterıp jür» degen sözdı erkekter qauymy joqqa şyǧaryp, özderınıŋ qandai jūmystan bolsyn jaltarmaitynyn baiqatyp otyrǧan körınedı. Eger ol otaǧasy retındegı jauapkerşılıktı sezınbese, janaiar bolsa, onda auyr jūmysqa barmaityn edı ǧoi degen pıkırmen de kelısuge bolar. Jalpy, kez kelgen sanaly azamat masyldyqqa salynbaityny belgılı. «Bes sausaq bırdei emes» degenge sensek, adamnyŋ da ala-qūlasy baryna köz jetkızu qiyn emes. Mūndai adamdardy ekı topqa jatqyzuǧa bolady. Bıreulerı, şyn mənınde eŋbekke jaramsyz, endı bırı mülde jūmys ıstegısı kelmeitınder. Qalai desek te, halyq şama şarqy kelgenşe jūmys ısteude. Tek tapqan tabysynyŋ bylai tartsa, bylai jetpei jatqany būltartpas şyndyq. Qazaqta aşy da bolsa nanymdy aitylǧan «Ölım bardyŋ malyn şaşady, joqtyŋ artyn aşady» degen söz bar. Jasyratyny joq, əuelden-aq aldy-artymyzdy bajailai bermeitın mınezımızdıŋ talai ret taiaq bolyp tigenı esımızde. Onyŋ bır ūşy ysyrapşyldyq pen masyldyqqa kelıp tıreledı. Əlbette, masyl adamnyŋ erteŋgı ömırden küder üzgen adamnan eş aiyrmasy joq der edık. Jalpy, halyqtyŋ qazırgı tabysy köŋılden şyǧatyndai deŋgeide emes ekenın eskersek, qoǧamda masyldyqtan būryn mūqtajdyq basym ekenıne köz jetkızemız. Bıreuge jaltaqtap, keŋse esıgın tozdyruǧa eşkımnıŋ de qūmar emestıgı belgılı. Al, bız, keide el ışınde mūqtajdyq bar ekenın eskermei, jappai masyldyq jailap alǧandai sezımde bolatynymyz qyzyq.