Aqtöbe oblysynyŋ ortalyǧynan şalǧai jatqan Yrǧyz audanynyŋ bırneşe auylyna gaz bardy. Kögıldır otyn endı Şeŋbertal, Qūrylys jäne Aqşi auyldarynyŋ 2 200-den asa tūrǧynyna qoljetımdı. 31 şaqyrymdai gaz qūbyryn jürgızuge memleket 328 millionnan astam teŋge bölgen dep habarlaidy "Adyrna" ūlttyq portaly.
Yrǧyz audanyna jūmys saparymen barǧan oblys äkımı Oŋdasyn Orazalin auyl tūrǧyndaryn quanyştarymen qūttyqtady.
"Yrǧyz audany gazdandyru jaǧynan problemalyq audandardyŋ bırı boldy. Öitkenı gaz tek ekı auylda ǧana bolǧan. Bügın memleket basşysynyŋ auyldyq aimaqtardy damytu, halyqtyŋ äl-auqatyn jaqsartu jönındegı tapsyrmasyna säikes taǧy üş auyl gazdandyryldy. Būl baǧyttaǧy jūmystar jalǧasuda, sonymen qatar, sumen qamtu sūraqtary da şeşılıp jatyr. Osynyŋ bärı elımızdıŋ täuelsızdıgınıŋ arqasynda",- dedı O.Orazalin.
Auyl tūrǧyndary kömır satyp alu üşın jylyna 200 myŋ teŋgege deiın jūmsaǧandaryn aitty.
"Gaz baǧasynyŋ arzandyǧymen qosa qanşa tūrmystyq problemadan arylamyz! Quanyşymyzda şek joq. Ülken armanymyz oryndaldy. Sol üşın memleket basşysyna, oblys äkımıne alǧys aitamyz",-dedı rizaşylyǧyn bıldırgen Qūrylys auylynyŋ tūrǧyny Şamşat Aitpambetov.
Aita keteiık, qazırgı taŋda Yrǧyz audanynda Qūtiköl auylyn gazben qamtu boiynşa qūrylys-montajdau jūmystary jügızılıp, taǧy üş auylǧa gaz beru üşın jobalyq-smetalyq qūjattama äzırlenıp jatyr. Biyl Aqtöbe oblysynda barlyǧy 14 eldı mekenge gaz kırgızılmek.
Keiın oblys äkımı Yrǧyz-Torǧai memlekettık tabiǧi rezervatyna bardy. Mekeme direktorynyŋ mındetın atqaruşy Meiırhan Duanbekov öŋır basşysyn qoryq jūmysymen tanystyrdy. Oŋdasyn Orazalin qoryqtyŋ öŋırdıŋ tabiǧi resurstaryn saqtap, qorǧauda orny erekşe ekenın atap öttı.
Jamanşyŋ bıregei meteorit kraterın qarap şyqqan oblys basşysy qūzyrly organdarǧa bıregei geologiialyq nysanǧa aparatyn turistık baǧyttardy äzırleudı, sonymen qatar, ony qorǧau jäne qyzmettı damytu boiynşa ūsynystardy qarastyruǧa engızudı tapsyrdy.
Oblys äkımı audan auyl şaruaşylyǧynyŋ qazırgı jaǧdaiyna basa nazar audardy. Oŋdasyn Orazalin jergılıktı tauar öndıruşılermen kezdesıp, olardyŋ öndırıp jatqan önımderımen tanysty, şarualardyŋ tolǧandyratyn mäselelerın tyŋdady, memlekettık qoldau şaralaryn tüsındırdı. Oblys basşysy mal azyǧyn daiyndau kölemın ūlǧaitu üşın barlyq mümkındıkterdı paidalanu kerektıgın basa aitty.
"Byltyr jemşöp daiyndauǧa subsidiia töleu üşın jergılıktı biudjetten 5,5 mlrd teŋge bölınse, biyl osy maqsatqa 6,8 mlrd teŋge bölu josparlanuda. Tölem engızılgennen keiın köptegen şarua qojalyqtary maldyŋ naqty sanyn tırkei bastaǧan soŋ būl soma östı. Mäselen, jylqy basy 124 paiyzǧa östı. Tölemdı şama kelgenşe erterek jasaimyz, tamyz aiynyŋ soŋynda bastaimyz dep josparlap otyrmyz.
Memleket qoldauy bar. Qysta mal qyrylyp qalmas üşın tübegeilı şaralardy qabyldau kerek", - dedı oblys äkımı.
Būl rette Oŋdasyn Orazalin osy jazda qūrǧaqşylyqtan eŋ köp zardap şekken körşı oblystarǧa qoldan keler kömek körsetu qajettıgın atap öttı.
"Adyrna" ūlttyq portaly.
